Այսօր Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանում անազատության մեջ գտնվող Վոլոդյա Ավետիսյանի գործով դատական նիստը թեժ էր: Այն սկսվեց նկատողություններով, ընթացավ վիրավորանքներով եւ ավարտվեց սպառնալիքներով:
Դատական նիստի հենց սկզբում դատավորը նկատողություն արեց նիստի մասնակիցներից մեկին՝ դատարանի նկատմամբ անհարգալից վերաբերմունք դրսեւորելու համար, թե իր ներս մտնելու ժամանակ ինչու էր նստած:
«Շատ էլ լավ է արել, ո՞ւր է դատարան»,- նկատողությանը արձագանքեց ազատամարտիկներից մեկը: Դատավորը պահանջեց նրան դուրս հրավիրել:
Հետո ՀՀ նախագահ Սերժ Սարգսյանի նկարով ու ռեժիմի դեմ պայքարող կոչերով ցուցապաստառով կանգնած մեկ ուրիշ ազատամարտիկին նկատողություն արեց պաստառի համար, կարգադրիչներին հրահանգեց նիստերի դահլիճից հեռացնել պաստառը:
Երբ մեղադրող Պապիկյանը սկսեց ընթերցել հանրապետությունից բացակայող գործով վկաների նախաքննական ցուցմունքները, նիստի մասնակից ազատամարտիկները կրկին աշխուժացան: Մի քանիսը իրենց տեղերից սկսեցին ռեպլիկներ բաց թողնել:
Ազատամարտիկ Սուսաննա Մարգարյանը նկատեց, որ գործով վկա Հենրիկ Հարոյանի ցուցմունքը իսկական հոգեկան խանգարում ունեցողի ցուցմունք է: Դատավորն էլ հակադարձեց, թե նույնը ձեր ասածներից կարելի է հետեւություն անել, հետո կոչ արեց նստել, հակառակ դեպքում դուրս կհրավիրի:
Կարդացեք նաև
Մի ուրիշ ազատամարտիկ էլ ասաց միանգամից ցուցմունք գրողին, սցենարիստին հրավիրեք դատարան, թող ասի՝ ինչը որից հետո է:
Մեկ ուրիշն էլ ասաց՝ նստեք դուք ու դատախազը միասին էդ հորինված ցուցմունքները կարդացեք, ինչ ենք եկել նստել էստեղ, ոչ մի նոր բան չկա:
Իսկ վկաներին հարցաքննած քննիչ Խաչիկյանին ազատամարտիկներից մեկը համեմատեց Վիլյամ Սարոյանի հետ:
Դատական նիստի ավարտին, երբ դատավորը անսպասելիորեն որոշեց հետաձգել նիստը, ինչին առարկեց Վոլոդյա Ավետիսյանի փաստաբան Արա Զաքարյանը, ազատամարտիկները վրդովվեցին: Նրանցից մեկը սկսեց սպառնալ՝ կկտրի դատավորի լեզուն ու «քոքից» կպոկի դատախազի եղունգները, նա ասաց՝ չի խնայի նաեւ նիստերի դահլիճից իրեն դուրս հրավիրող կարգադրիչին. նրա էլ ականջները կպոկի:
Ազատամարտիկները նիստերի դահլիճից հեռացան՝ դատախազին մեղադրելով ապօրինությունների մեջ, նրան անվանելով «Սերժիկի ստրուկ»:
Մանրամասները տեսանյութում
Արփինե ՍԻՄՈՆՅԱՆ
