«Արդյոք գյուղատնտեսությունն այս տարեվերջին, հաշվի առնելով կարկտահարությունն ու ցրտահարությունը, աճ կարձանագրի»,- խորհրդարանում, 2013 թվականի բյուջեի կատարողականի քննարկումների ժամանակ այս հարցը ՀՀ գյուղնախարար Սերգո կարապետյանի տվեց ՀՀԿ-ական պատգամավոր Տաճատ Վարդապետյանը: «Կարկուտը ամեն տարի եղել է և լինելու է, բայց այն չի կարող ամբողջ հանրապետության առումով վնասել, քանի որ լինում է տեղային: Ամեն տարի 200-300 համայնքներ կարկուտից տուժում են և դա մեր համար սովորական երևույթ է»,- պատգամավորին արձագանքեց նախարարը: Անդրադառնալով կոնկրետ ծիրանի բերքին էլ, ասաց, որ եթե անցած տարի ունեցել ենք 88 հազար տոննա բերք, ապա այս տարի սպասվում է 8-10 հազար տոննա ծիրանի բերք:
«Հիմա ամբողջ շուկան ողողված է ծիրանի ցոգոլով, ուրեմն կա չէ՞ ծիրան, որ ցոգոլ են վաճառում: Այնպես որ ծիրանի բերք էլ ենք ունենալու ու արտահանելու էլ ենք»,-ի հեճուկս հասարակության հոռետեսական տրամադրությունների` արտահայտվեց Սերգո Կարապետյանը:
Ի դեպ, նա նկատեց նաեւ, որ միայն ծիրանով չի որոշվում գյուղատնտեսության աճը եւ հավելեց, որ այս տարի 16-17 հազար հեկտար լրացուցիչ ցանքեր են ունենալու, իսկ տարեվերջին, գյուղատնտեսության ոլորտում անպայման աճ է լինելու, վստահեցրեց նախարարը: Տաճատ Վարդապետյանը պնդեց, որ նախարարն իր կանխատեսումներն ու հավաստիացումները թվերով ամրագրի: «Դուք ուզում եք անպայման թիվ հնչեցնեմ…. աշխատելու ենք անցած տարվա ցուցանիշը պահպանենք»,- միայն ասաց գյուղնախարարը:
Նելլի ԳՐԻԳՈՐՅԱՆ
