Սահմանված ժամանակացույցով շարունակվում են վարչական շրջանների ղեկավարների կողմից յուրաքանչյուր հինգշաբթի կազմակերպվող քաղաքացիների ընդունելությունները:
Երևանի քաղաքապետ Տարոն Մարգարյանի հանձնարարությամբ ընդունելություններին պարբերաբար մասնակցում են նաև քաղաքապետի տեղակալները:
Քաղաքապետի առաջին տեղակալ Կամո Արեյանը մասնակցել է Աջափնյակ վարչական շրջանում կազմակերպված բնակիչների ընդունելությանը: Զրուցելով ընդունելության եկած բոլոր բնակիչների հետ և լսելով նրանց կողմից բարձրացվող խնդիրները՝ Կամո Արեյանը բարձրացված հարցերին տեղում տվել է համապատասխան լուծումներ և սպառիչ պատասխաններ: Անարձագանք չեն մնացել նաև քաղաքապետարանի լիազորություններից դուրս գտնվող հարցերը, որոնց մասով քաղաքացիներն ուղղորդվել են համապատասխան կառույց:
Քաղաքային իշխանություն-բնակիչ կապն առավել ամրապնդելու և բնակիչներին հուզող հարցերին տեղում ծանոթանալու նպատակով քաղաքապետի տեղակալ Արամ Սուքիասյանը մասնակցել է Ավան վարչական շրջանի ղեկավարի կողմից անցկացվող քաղաքացիների ընդունելությանը և քաղաքապետարանի լիազորության շրջանակում ներկայացված բոլոր հարցերին համապատասխան ընթացք տվել:
Կարդացեք նաև
Բնակիչները շնորհակալություն են հայտնել ընդունելության համար և ընդգծել, որ դրանց անցկացումն ու հատկապես քաղաքապետի տեղակալների մասնակցությունն իրենց դրական արդյունքն են տալիս և շատ հարցեր լուծում են ստանում հենց ընդունելության ժամանակ:
Երևանի քաղաքապետարանի տեղեկատվության և հասարակայնության հետ կապերի վարչություն
