Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանում սկսվել է պահեստազորի գնդապետ Վոլոդյա Ավետիսյանի գործով դատական նիստը: Մինչ դատարան մտնելը, բակում ազատամարտիկները կոչ էին անում ազատ արձակել Վոլոդյա Ավետիսյանին, ապա հայրենասիրական երգերով մտան նիստերի դահլիճ:
Պարզվեց, որ մեղադրող, դատախազ Պապիկյանին փոխարինելու է դատախազ Կարեն Հարությունյանը: Պատճառը դատարանում չհայտնեցին, բայց դատախազի փոփոխության լուրը ազատամարտիկների քննարկման պատճառ դարձավ: Ազատամարտիկ Գագիկ Սարուխանյանը հեգնեց. «Թե նախորդ դատախազը երեւի մարդ է դարձել, մարդկային խիղճն արթնացել է, դրա համար էլ նա հրաժարվել է գործից»: Ապա ասաց, որ «սրան էլ մարդ կսարքենք մեր երգերով, մեր համառությամբ»: Մյուս ազատամարտիկներն էլ հեգնեցին, թե նախորդ դատախազը գնացել է դասերի, որ սովորի անմեղ մարդկանց լավ զրպարտել:
Դատական նիստը այս պահին կրկին ընդմիջվել է, նախագահող Ավետիսյանը այս պահին խորհրդակցական սենյակում քննարկում է նախորդ դատական նիստին Վ. Ավետիսյանի փաստաբան Արա Զաքարյանի միջնորդությունը՝ ընտրված խափանման միջոց կալանքը փոխելու վերաբերյալ:
Այսօր էլ նախագահող Ավետիսյանը նոր դատախազից հետաքրքրվեց, թե ինչ դիրքորոշում ունի Զաքարյանի ներկայացրած միջնորդության վերաբերյալ: Նոր դատախազն էլ պնդեց նախկին գործընկերոջ պնդումը, թե փաստական հանգամանքների բացակայության պարագայում ինքը առարկում է եւ պահանջում մերժել:
Կարդացեք նաև
Դատական նիստի սկիզբը ընթացավ նկատողություններով. նախագահող Ավետիսյանը պահանջում էր դուրս հրավիրել շարունակ ռեպլիկներ բաց թողնող ազատամարտիկներին, բայց վերջիններս այդպես էլ դուրս չեկան: Ազատամարտիկները նաեւ երգում-պարում էին, ծափահարում՝ «Կեցցե ազատությունը» վանկարկելով:
Մանրամասները՝ շուտով:
Արփինե ՍԻՄՈՆՅԱՆ