Ըստ Ռոզա Ղազումյանի, թեւավոր խոսք կա՝ երբ մեկը մեկին լավ է ընդունում, ասում են՝ ոնց որ Միկոյանը մտնի Սանահին:
Հովհաննես Թումանյանի Դսեղի թանգարանի վարիչ Ռոզա Ղազումյանը Aravot.am-ի հետ զրույցում ասաց, որ տեղյակ չէ, թե երբեւէ Թումանյանի կինը՝ Օլգան, թույլ տված չլինի, որ Անաստաս Միկոյանը ներս մտնի Երեւանի թանգարան:
Ինչ վերաբերում է Դսեղի թանգարանին, տիկին Ռոզան պատմում է, որ Թումանյանի ծննդյան հարյուրամյակի առիթով՝ 1969թ. սեպտեմբերի վերջին, Անաստաս Միկոյանը մարշալ Հովհաննես Բաղրամյանի հետ այցելել է Դսեղի թանգարան ու ջերմ ընդունելություն գտել: «Դա մեծ տոնախմբություն էր, նկարներ կան պահպանված: Հանրապետության ղեկավարները, միութենական հանրապետություններից գրողներ, Միկոյանն ու Բաղրամյանը եկան մասնակցեցին: Նրանք շատ ջերմ զրուցում էին գյուղացիների հետ, գյուղացիները սեղաններ էին բացում նրանց համար: Հետո Միկոյանը Սանահինում՝ իր հայրենի գյուղում գիշերեց: Հատկապես Սանահինում իրեն շատ էին սիրում: Նրան լավ ընդունելու հետ կապված նույնիսկ թեւավոր խոսք էր ծնվել: Երբ մեկը մեկին լավ էր ընդունում, ասում էին՝ «Ոնց որ Միկոյանը մտնի Սանահին»: Զարմանում եմ, երեւի մեր հայերի սովորությունն է, եթե մեկի անունը մի քիչ լավ է լինում, անպայման մի բիծ դնեն»,-հայտնեց թանգարանի վարիչը:
Հիշեցնենք, որ վերջերս հրապարակվել էր Սուրմա Թումանյանի եւ Իրմա Սաֆրազբեկյանի նամակը , որով նրանք հերքել են հայկական ԶԼՄ-ներում տարածված պնդումները, թե Թումանյանի ընտանիքը լարված հարաբերություններ է ունեցել խորհրդային շրջանի կուսակցական գործիչ Անաստաս Միկոյանի հետ:
Կարդացեք նաև
Մինչդեռ Հովհաննես Թումանյանի տուն-թանգարանի տնօրեն Նարինե Թուխիկյանը պնդում է, որ Օլգա Թումանյանը չի ընդունել Միկոյանին: Ավելին, ըստ Երեւանի թանգարանի տնօրենի, Թումանյանի դուստրը՝ Աշխենը, ընդամենը մեկ անգամ է Միկոյանի մասին հիշատակել , այն էլ ոչ դրական շեշտադրմամբ՝ Միկոյանը խոստացել է հեղինակային իրավունքի եւ Օլգա Թումանյանի թոշակի հարցը լուծել, ու այդպես էլ չի արել:
Գոհար ՀԱԿՈԲՅԱՆ
