Այսօր Երեւանում տեղի ունեցավ Քաղաքացիական հասարակության կազմակերպությունների զարգացմանն ուղղված ինստիտուցիոնալ եւ օրենսդրական բարեփոխումների վերաբերյալ քննարկում, որը նպատակ ունի խթանել Հայաստանի՝ Եվրամիության մերձեցման գործընթացը եւ նպաստել Հայաստանում ժողովրդավարության ամրապնդմանը:
Քննարկմանը բացման խոսքով հանդես եկավ ՀՀ Արդարադատության նախարար Հովհաննես Մանուկյանը, որն իր խոսքում նշեց, որ այս քննարկման ընթացքում ծրագրի մի քանի հիմնական ուղղությունների վրա է ուշադրություն դարձվելու: Դրանք են՝ մասնավոր սեկտորի, հասարակական կազմակերպությունների ֆինանսավորման հետ կապված խնդիրները, հասարակական միավորների հաշվետվության հետ կապված խնդիրները եւ մեխանիզմները, հասարակական միավորների եւ կառույցների մասնակցությունը եւ դրանց ինտեգրումը արդարադատության գործընթացում:
Aravot.am-ը քննարկմանը ներկա ՀՀ ԱԺ «Ժառանգություն» խմբակցության քարտուղար Թեւան Պողոսյանից հետաքրքրվեց, արդյո՞ք նման բարեփոխումները հեշտությամբ կկատարվեն , եթե մինչեւ հիմա էլ ոստիկանության եւ քաղաքացիական հասարակության միջեւ լինում են բախումներ՝ ինչի մասին վկայում են հունիսի 23-ին Սարյան փողոցում անցկացված բողոքի ակցիայի ժամանակ ոստիկանության գործողությունները: Թեւան Պողոսյանը կարծիք հայտնեց, որ ոստիկանների եւ ակտիվիստների կողմից կատարած քայլերը պետք է լինեն համաչափ. «Արդյո՞ք այդ 20 հոգուն, որոնց տարել են, ոստիկանները նրանց նկատմամբ համաչա՞փ են գործել, թե ոչ: Օրենքի համաձայն ոստիկանությունը ունի իրավունք որոշ դեպքերում ուժ կիրառել ակցիայի կանոնավոր ընթացքը ապահովելու համար»:
Սակայն պատգամավորի խոսքերով՝ այստեղ խնդիրն այն չէ, թե ոստիկանները նման քայլ արել են, թե ոչ, այլ այն է, թե որքան համաչափ է եղել նրանց արարքը: «Եթե կա ինքնաբուխ խաղաղ ակտ, եւ նույնիսկ այն պարագայում, երբ էմոցիոնալ դաշտի շրջանակը միգուցե եւ մի քիչ տաքանում է, չի կարելի միանգամից ասել, որ քանի որ իրավունք ունենք, պետք է անպայման այդ գործողությունը կատարեր: Ոստիկանները պետք է բացատրեն, ոչ թե միանգամից բռնեն ու տանեն: Այստեղ համաչափության խնդիրը պետք է դիտարկենք եւ ապագայի համար թույլ չտանք, որ որեւէ մի կողմը անցնի թույլատրելի սահմանը: Մեղավորները դեպքի համար անպայման պետք է պատժվեն»:
Կարդացեք նաև
Մանրամասն՝ տեսանյութում
ՀՀ Արդարադատության նախարարից նույնպես փորձեցինք ստանալ այս հարցի պատասխանը, սակայն միայն մի պատասխան ստացանք՝ «Համաձայն չեմ»:
Քաղաքացիական հասարակության կազմակերպությունների զարգացմանն ուղղված ինստիտուցիոնալ եւ օրենսդրական բարեփոխումների վերաբերյալ քննարկումը կազմակերպվել է Արդարադատության նախարարության կողմից եւ «Աջակցություն Հայաստանում ժողովրդավար գործընթացին ծրագրի շրջանակներում»: Ծրագիրը ֆինանսավորվում է Եվրոպական Միության կողմից: Ծրագրի ընդհանուր արժեքը կազմում է 949 670 եվրո:
Էլյա ՀՈՎՀԱՆՆԻՍՅԱՆ
