Վերջերս ԿԳ նախարար Արմեն Աշոտյանը այցելել էր սահմանամերձ Մովսես գյուղի դպրոց, որի աշակերտները նախարարից խնդրել էին լուծել իրենց դպրոցի որակյալ ինտերնետի հարցը:
Aravot.am-ը որոշեց պարզել, թե այդ ուղղությամբ ինչ է արել Կրթական տեխնոլոգիաների ազգային կենտրոնը (ԿՏԱԿ), մարմին, որը զբաղվում է դպրոցները ինտերնետով ապահովելու հարցով:
ԿՏԱԿ-ի տնօրեն Արտակ Պողոսյանն Aravot.am-ի հետ զրույցում նշեց, որ Հայաստանի Հանրապետությունում բոլոր կրթական հաստատությունները մեկ ցանցի մեջ են միացված, որի մուտք ունեն ինտերնետ: «Այն վայրերում, որտեղ հասանելի է օպտիկա-մալուխային՝ լարային ինտերնետը, մենք ապահովում ենք գերարագ ինտերնետ, Հայաստանի օպտիկա-մալուխային ինտերնետի դեպքում այն առնվազն 8 մգբ/վ է , ռադիոկապի միջոցով տրամադրվող ինտերնետի դեպքում առնվազը 3 մգբ/վ: Կան համայնքներ, որտեղ կապը հասցնում ենք ռադիոկապի միջոցով: Ցավոք, մի շարք համայնքների պարագայում, որոնք սահմանամերձ են կամ բարձրլեռնային դիրք ունեն, մեր տեխնոլոգիաները եւ ֆինանսավորումը դեռեւս հնարավորություն չեն տալիս հասցնել լարային ինտերնետ կամ ռադիոկապ: Մովսես գյուղի խնդիրն էլ այդպիսին է: Գյուղի մի կողմում ադրբեջանական տարածքն է, մյուս կողմից էլ գյուղը շրջապատված է սարերով, եւ ռադիոկապով ինտերնետ հասցնելն ուղղակի հնարավոր չէ:
Կարդացեք նաև
Շատ դեպքերում մենք կիրառում ենք 3G տեխնոլոգիաները, այսինքն` համապատասխան USB flash-ներով ենք ինտերնետ տրամադրում: Ճիշտ է, այդպիսի ինտերնետն այդքան էլ հուսալի չէ, բայց այլ հնարավորություն նման համայնքներին ինտերնետով ապահովելու, դեռեւս չունենք»,- հայտնեց պարոն Պողոսյանը:
Նա հավելեց, որ ինչպես Մովսեսի այնպես էլ, մյուս համայնքների խնդրին քաջատեղյակ են: «Մենք ուսումնասիրում ենք, թե որ համայնքում կոնկրետ, որ բջջային օպերատորի կապն է ավելի արդյունավետ: Օրինակ` Մովսես գյուղի մեր ուսումնասիրությունները ցույց են տվել, որ «Օրանժի» կապն է արդյունավետ, ուստի տրամադրել էինք «Օրանժի» համապատասխան սարքավորումներ: Նոր տեղեկություններով հիմա «ՎիվաՍել-ՄՏՍ»-ի ցանցն էլ է այնտեղ ուժեղացել, եւ մենք պատրաստվում ենք մոտակա 1-2 օրվա ընթացքում դպրոցին տրամադրել լրացուցիչ սարքավորում՝ ՎիվաՍել-ՄՏՍ-ի կապուղիների օգտագործման համար: Եվ կարծում ենք խնդիրը ավելի կլուծվի: Մենք ունենք 21 համայնք, որտեղ օգտագործվում է 3G կապը, այդ թվում Մովսես գյուղն է, որտեղ դեռեւս հնարավորություն չունենք այլ տեխնոլոգիայով ապահովել ինտերնետ տեղի դպրոցներին»:
Գոհար ՀԱԿՈԲՅԱՆ
Դպրոցի լուսանկարը՝ «168 ժամ»-ի
Հարգելի Գոհար, հավանաբար ԿԳ նախարարը տեղյակ չէ, որ այսպես կոչված ԿՏԱԿ-ի կողմից Տավուշի մարզի դպրոցներին ինտեռնետով ապահովելու համար բավականին մեծ գումար է օգտագործվել, սակայն անօգուտ: Ով պետք է պատասխան տա այդ նպատակով անիմաստ և անտեղին վանտված գումարների համար, դրանից էլ նախարարը տեղյակ չէ: Երևի թե մինչ պետբյուջեից գումարներ ծախսելն էր հարկավոր ուսումնասիրել, թե որտեղ, որ ցանցի կապն է առավել արդյունավետ գործում, փոխարենը ԿՏԱԿ-ի մասնագետները ս.թ. օգոստոսի վերջին այցելել են Բերդի տարածաշրջան և հենց այդ նպատակով պետբյուջեից հերթական գումար պոկելու համար համապատասխան ծրագիր մշակել: Մեկ հավելում ևս, պետք չէ Մովսես գյուղն առանձնացնել Տավուշի մարզի մնացած սահմանամերձ գյուղերից, անտեղյակների համար ասեմ, որ բոլոր սահմանամերձ գյուղերում հինականում նույն իրավիճակն է տիրում:
Մովսեսից առավել վատ վիճակում են Ներքին Կարմիրաղբյուր և Այգեպար գյուղերը, որոնք ամբողջապես գտնվում են թշնամու թիրախում…
(Տավուշեցի)