«Հանրության 35 տոկոսը կողմ է նախագահական, 31 տոկոսը՝ խորհրդարանական, 9 տոկոսը՝ կիսանախագահական համակարգին, 8 տոկոսն առաջարկել է միապետության կառավարման համակարգը»,- այսօր «Հասարակական հետազոտությունների առաջատար խումբ» (APR Group) հասարակական կազմակերպությունը ներկայացրեց՝ 1300 հոգու շրջանում իրականացված հարցման արդյունքները, որոնք վերաբերում են ՀՀ Սահմանադրական բարեփոխումների գործընթացին:Հարցումն իրականացվել է օգոստոս ամսին Երևանում և մարզերում:
Հարցին՝ «սահմանադրական բարեփոխումների անհրաժեշտություն կա՞», Aravot.am-ի հետ զրույցում ծրագրի սոցիոլոգ Լիանա Բալյանն ասաց. «Հարցվածների 60.1 տոկոսը կարծում է, որ անհրաժեշտություն չկա, 25,4 տոկոսը անհրաժեշտություն տեսնում է: Հարցվածների 18 տոկոսը վստահում է գործընթացին, 81.5 տոկոսը պատասխանել են, որ չեն վստահում»:
Ծրագրի փորձագետ Արա Ղազարյանը կարևորեց այն, որ ընտրությունների լեգիտիմությունը չապահովվի, ապա սահմանադրական բարեփոխումները ոչ մի արդյունք չեն ունենա: Նա մանրամասնեց. «Հակառակ դեպքում խորհրդարանական համակարգը կրկին կտանի միապետության: Եթե նորից պետական մարմիններին քաղական ուժերը չզսպեն, ոչինչ չի ստացվի: Պարտադիր կուտակայինի օրինակը մեր առջև դրված է: Սա կարող է տեղի ունենալ նաև նոր սահմանադրության համակարգում»:
Aravot.am-ը ծրագրի ղեկավար, APR Group-ի նախագահ Ռուբեն Սարգսյանից հետաքրքրվեց՝ հետազոտության արդյունքները ներկայացվե՞լ են սահմանադրական բարեփոխումների հանձնաժողովին և ինչպիսի՞ն էր արձագանք, պարոն Սարգսյանը պատասխանեց, թե ներկայացվել են, բայց դեռ արձագանքներ չկան:
Կարդացեք նաև
Մեր հարցին՝ հանրությունն առանձնապես շահագրգռված չէ սահմանադրական բարեփոխումներին, քաղաքական ուժերի մեծամասնությունը՝ ևս, ուստի հնարավո՞ր է գործընթացը շարունակելու դեպքում հասարակական լուրջ ընդվզման առաջ կանգնենք, պարոն Ղազարյանը պատասխանեց. «Միգուցե, եթե ավելի լավ արվեր իրազեկումը, հասարակական կարծիքն այլ լիներ: Մեր երկրում նիհիլիզմ է տիրում, հուսահատություն, Սյունիքի մարզպետի նշանակումն ավելի խորացրեց այդ տրամադրությունները ու եթե նման նշանակումները շարունակվեն, կարող են հասարակական լուրջ ընդվզումներ լինեն»:
Հարցին՝ արդյոք սահմանադրական բարեփոխումներով լուծվում է իշխանության վերարտադրման խնդի՞րը, պարոն Ղազարյանը պատասխանեց. «Ցանկացած բարեփոխում էլ կարող է ուղղված լինել այդ խնդրին, իշխանությունը հասկանում է, որ ճգնաժամի մեջ է և փորձում է երկիրը ճգնաժամից դուրս բերել: Եթե ընդդիմությունը որևէ այլ պատճառ բերեր՝ բացի այն, որ իշխանությունն ուզում է վերարտադրվել, կհավատային: Ուստի Ձեր հարցին՝ և այո, և ոչ, կարող եմ պատասխանել»:
Տաթև ՀԱՐՈՒԹՅՈՒՆՅԱՆ
