Ֆուտբոլի ֆեդերացիայի պաշտոնական կայքը գրում է. Քիչ առաջ ավարտվեց Հայաստանի հավաքականի գլխավոր մարզիչ Բեռնար Շալանդի մամուլի ասուլիսը.
– Նախ շնորհավորում եմ Պորտուգալիային, որը շատ լավ թիմ ունի: Ցանկանում եմ շնորհավորել նաեւ իմ թիմին, նրանք կռվեցին, լավ պայքարեցին, լավ էինք տրամադրված խաղին: Այո, Պորտուգալիան լավ թիմ է, բայց մենք հիմար գոլ ընդունեցինք՝ չկարողանալով գնդակը հեռացնել տուգանային հրապարակից: Մենք կարող էինք ավելի լավ արդյունքի հասնել: Ես հիասթափված եմ արդյունքից: Բայց ես վստահ եմ, որ մենք լավ ապագա ունենք:
– Հրայր Մկոյանի վնասվածքից հետո Ձեր ծրագրերը որքանո՞վ էին փոխվել:
– Ոչ, այդ վնասվածքը չազդեց: Տարոն Ոսկանյանը լավ խաղ անցկացրեց Սերբիայի դեմ: Մկոյանը երկար ժամանակ չէր խաղացել: Ես ընտրություն ունեի, թե ում խաղացել եւ ես ընտրել էի Ոսկանյանին: Բացի գոլի պահից, ես գոհ եմ Ոսկանյանի խաղից: Պետք է նաեւ նշեմ, որ Մկոյանն էլ ասաց ինձ, որ 100 տոկոսով պատրաստ չէ:
Կարդացեք նաև
– Միգուցե ժամանակն է՞, որ նոր խաղացողներ հրավիրեք պաշտպանական գծի համար: Դուք գիտեք ում մասին է խոսքը…
– Այս պահին իմ խնդիրը միայն պաշտպանությունը չէ: Մեզ պակասում էին կառուցողական գործողությունները. որոնք պետք է սկսվեն դարպասապահից մինչեւ հարձակման գծի խաղացողներ: Մենք կարող ենք պահել գնդակը, կարող ենք ավելի հաջող գործել: Մենք պետք է ավելի արագ գործենք: Պետք է ավելի արագ անցնենք գրոհների, երկար փոխանցումներով ավելի հաջող գործենք:
– Դուք ասում եք մենք հիմար գոլ բաց թողեցինք, բայց մրցակիցը տարածքային մեծ առավելություն ուներ:
– Դուք գիտե՞ք, թե ով է Պորտուգալիան Եվրոպայում: Պորտուգալիան իր կազմում ունի Ռեալի խաղացողներ: Դա հեշտ չէ: Նորմալ է, որ մրցակիցն առավելություն ուներ: Պորտուգալիան միշտ էլ հարձակվողական ֆուտբոլ է խաղում եւ ստիպում է մրցակցին պաշտպանվել: Հետաքրքիր կլիներ, եթե այդ հարցը հնչեր 0:0 հաշվի ժամանակ:
Վերջում Բեռնար Շալանդը զայրացած ավելացրեց հետևյալը.
«Ես հարգանք ունեմ Պորտուգալիայի նկատմամբ, բայց երբ մենք ժամանեցինք այստեղ, մեզ տվեցին շատ վատ խաղադաշտ, չտվեցին լավ խաղադաշտ՝ ասելով, որ այնտեղ Պորտուգալիան է մարզվում: Բացի այդ այսօր խաղին մենք ուշացած եկանք, քանի որ ավտոբուսի վարորդը և ոստիկանները չգիտեին ճանապարհը: 40 րոպե մեզ պտտեցին: Ես շատ զայրացած եմ, սա պատիվ չի բերում Պորտուգալիային: Այդպես չի կարելի»:
Ստացվում է, որ ով էլ լինի Հայաստանի մարզիչը, նա այդ պաշտոնը ստանձնելուն պես սկսում է մտածել այսպես ասած հայերեն: Ի՞նչ է նշանակում Պորտուգալիան իր կազմում ունի Ռեալի խաղացողներ: Եղբայր, այդքան եթե վախենալու են նրանք, ինչո՞ւ եք դաշտ դուրս գալիս, ինչո՞ւ եք ընդհանրապես ֆուտբոլից խոսում: Եւ հետո, ի՞նչ է նշանակում, երբ մենք ժամանեցինք այստեղ, մեզ տվեցին շատ վատ խաղադաշտ, չտվեցին լավ խաղադաշտ՝ ասելով, որ այնտեղ Պորտուգալիան է մարզվում: Անգամ եթե ոչ մի խաղադաշտ էլ չտային ու մի օր էլ չմարզվեիք՝ ի՛նչ, պիտի մոռանայի՞ք ֆուտբոլ խաղալը: Մենք միշտ ինչ-որ անիմաստ արդարացումներ ենք փնտրում, չտեսնելով, որ հենց նման մտածելակերպն է մեզ կործանում ոչ միայն ֆուտբոլում, այլեւ մեր կյանքի մնացած բնագավառներում: Դե վերջում էլ, քանի որ ավտոբուսի վարորդը և ոստիկանները չգիտեին ճանապարհը (հա՞ որ) եւ 40 րոպե մեր թիմին պտտեցին, դրանից Շալանդը շատ զայրացավ ու որոշեց, որ մերոնք պիտի պարտվեն: Ու թեպետ սա պատիվ չի բերում Պորտուգալիային, բայց նա հարգանք ունի Պորտուգալիայի նկատմամբ: (Տեսնես Պորտուգալիայի ավտոբուսի վարորդն ու ոստիկանները ճանապարհը գիտեի՞ն): Այսպիսի բաներ: