«Արմպլաստ» ընկերության սեփականատեր Վարդան Հայրապետյանն էկոնոմիկայի նախարար Կարեն Ճշմարիտյանից հետաքրքրվեց, թե ի՞նչ հնարավորություն ունի այսօր նախարարությունը սաստելու խողովակներ եւ հումք արտադրող ռուսական որոշ ընկերությունների, որոնք շուկայում դեմպինգային քաղաքականություն են վարում` խոչընդոտելով մնացած արտադրողներին:
«Այդ վիճակում չենք կարող աշխատել, այսօր մեր արտահանումը գտնվում է պրոբլեմի տակ: Ինչո՞վ կարող եք աջակցել այդ հարցում»,-նախարարին հարցրեց «Արմպլաստի» սեփականատերը:
Այսօր էկոնոմիկայի նախարարությունում նախարար Կարեն Ճշմարիտյանը գործարարների հետ կազմակերպել էր հերթական քննարկումը, վեր հանելու ոչ մետաղական հանքանյութերի արտադրատեսակների արտադրության եւ շինանյութերի արտադրության ոլորտների խնդիրները:
Կարդացեք նաև
Գործարար Վարդան Հայրապետյանի մտահոգությանն ի պատասխան՝ նախարարն ասաց, որ դեմպինգն ապացուցելը պրակտիկայում անհնարին է: Կարեն Ճշմարիտյանը բերելով ԱՄՆ-ի եւ Ճապոնիայի օրինակը, որոնք մեքենաների ներմուծման գործով 30 տարի «դատվել» են, այդպես էլ չեն կարողացել ապացուցել, որ Ճապոնիան դեմպինգային քաղաքականություն է վարել:
«Ռոսպլաստ» ընկերության ներկայացուցիչ Արտաշես Պետրոսյանն էլ դժգոհություն ներկայացրեց, որ հայ արտադրողները չեն կարողանում ապրանք արտահանել Թուրքիա, իսկ թուրքական ապրանքը հայկական շուկայում լցված է. «Ո՞նց է լինում, որ թուրքական ապրանքն այդքան հեշտությամբ կարողանում է գալ մեր երկիր` ցածր մաքսատուրքով եւ ոչ մի խնդիր չի լինում եւ մեր ապրանքն էլ չի կարողանում մրցակցել, չնայած որակով թուրքականին չի զիջում: Ինչո՞ւ նրանք կարող են մեզ այդքան խանգարել, ավելին՝ ջարդել մեր շուկան»:
Գործարարը նաեւ ասաց, որ ապրանքն արտահանելիս, ամեն անգամ ստիպված են լինում ծագման սերտիֆիկատ հանել:
Ծագման սերտիֆիկատի հետ կապված նույն դժգոհությունը ներկայացրեց «Մանանա սթոն» ընկերության ղեկավար Յուրա Նիկողոսյանը: Գործարարը պետությունից գումար չի ուզում, ուզում է օրենսդրական դաշտը կարգավորեն, որ նորմալ պայմաններում աշխատեն:
Կարեն Ճշմարիտյանը հետաքրքրվելով, թե ներկաների մեջ էլի՞ կան մարդիկ, որոնք կանգնում են այսպիսի խնդիրների առաջ, «Ռոսպլաստ»-ի ներկայացուցչին հարցրեց. «Այդ ո՞նց է, որ թուրքական ապրանքն այդքան ճանապարհ է անցնում, տրանսպորտի ծախսերը, դրան էլ գումարած 10 տոկոս հարկը եւ ձերը, որ տեղական է, մրցունակ չէ»:
Նախարարն ասաց, որ այսօր գործարարներին հուզող մի շարք հարցեր, այդ թվում եւ այսօրվա քննարկման ընթացքում բարձրացվածները, փոխվարչապետի հետ քննարկվում են:
Գործարար Գագիկ Կիրակոսյանն առաջարկեց, որ Կենտրոնական բանկը գործարարների համար ծրագրեր մշակի եւ իրականացնի:
Նախարարն ասաց, որ այդ գործառույթը Կենտրոնական բանկին վերապահված չէ եւ որ գործարարների համար նման ծրագրեր անում են առեւտրային բանկերը:
Լուսինե ԲՈՒԴԱՂՅԱՆ
