Թուրքիայի նախագահ Ռեջեփ Թայիփ Էրդողանը «Դարդանելի պատերազմական գործողությունների 100 -ամյակի» կապակցությամբ պետականորեն կազմակերպելիք միջոցառումներին, ի թիվս աշխարհի երկրների այլ նախագահների, նախատեսել է հրավիրել ՀՀ նախագահ Սերժ Սարգսյանին:
Մինչ այդ հանրապետության նախագահ Սերժ Սարգսյանը հրավիրել էր Թուրքիայի նախագահ Ռեջեփ Թայիփ Էրդողանին մասնակցելու ապրիլի 24-ի միջոցառումներին:
Իրավապաշտպան Ավետիք Իշխանյանն Aravot.am-ին վիճահարույց հրավերի հետ կապված ասաց.«Որովհետեւ ի սկզբանե հայտնի էր, որ Էրդողանը չի գալու, դա սխալ որոշում էր»:
Ըստ իրավապաշտպանի` դրան հետեւեց Էրդողանի եւ Ալիեւի ասուլիսի ժամանակ արված հայտարարությունը` ապրիլի 24-ի «Հաղթանակի» միջոցառումներին հրավիրել Հայաստանի նախագահին:
Կարդացեք նաև
«Փաստորեն, դա ծաղր էր մեր ողբերգությանը: Կարծում եմ` դրանից հետո Հայաստանի նախագահի կողմից չպիտի լիներ պատասխան Էրդողանին: Սակայն լրագրողի հարցին, թե ինչպես է վերաբերվում Էրդողանի հրավերին, նախագահը կարող էր զերծ մնալ պատասխանից, ուղղակի ասելով, թե չի կարդացել հրավերը: Այդ հրավերին հետեւեց հանրապետության նախագահի պատասխանը Էրդողանին: Ես չեմ ուզում անդրադառնալ դրան, սակայն այդքանից հետո, երբ մեր նախագահը դիմում է «Ձերդ գերազանցություն» բառակապակցությամբ, կրկնակի վիրավորական է մեր ժողովրդի, մեր պետության համար»,-ասաց Ավետիք Իշխանյանը:
«Իսկ ինչպե՞ս դիմել, մի՞թե արարողակարգային չէ նման դիմելաձեւը» մեր հարցին իրավապաշտպանը պատասխանեց. «Կարող էր դիմել «պարոն նախագահոով»:
Ռուզան ՄԻՆԱՍՅԱՆ
