«Հիմնադիր խորհրդարանի» անդամներին Բերձորում Արցախի ոստիկանության կողմից ծեծի ենթարկելու միջադեպի մասին տարաբնույթ մեկնաբանություններ եղան հանրության շրջանում. ոմանք ասում էին՝ «Հիմնադիր խորհրդարանն» իրավունք չուներ ոտք դնելու Արցախ, ոմանք բռնությունը դատապարտում էին, ոմանք էլ հայտարարում էին, թե շարասյան մասնակիցներն են սադրել ոստիկաններին:
«Հայրենիքին, որի զավակները հավասար չեն մահվան եւ արդարության առջեւ, շատ դժվար ապագա է սպասվում»,- «Առավոտի» հետ զրույցում անդրադառնալով Բերձորի միջադեպին՝ Գարեգին Նժդեհի այս խոսքերով սկսեց իր դիտարկումները «Ազատագրական բանակի» ազատամարտիկ, Մահապարտների գումարտակի անդամ Գագիկ Գինոսյանը: «Եթե ինձ համար այդ ճանապարհը ընդունելի լիներ, ես էլ երեւի շարասյան մեջ կլինեի, ես այդ շարասյան մեջ չէի: Նույնիսկ եթե այդ շարասյունը սխալ ուղղությամբ է գնում, սխալ քայլեր է անում, չի նշանակում, որ ինչ-որ մեկը պիտի որոշի՝ ով իրավունք ունի, ով չունի, դրա համար գոյություն ունի մեկ գերակա բան` դա ՀՀ Սահմանադրությունն է: Իրավական առումով որեւէ մեկն իրավունք չունի կանխելու որեւէ մեկի ազատ տեղաշարժը Հայաստանի Հանրապետությունում»,- նկատեց Գինոսյանը:
Հիշեցնենք, որ «Հիմնադիր խորհրդարանը» մոտ 40 մեքենայով հունվարի 31-ին շարժվում էր Արցախ՝ «100-ամյակն առանց ռեժիմի» կարգախոսով. Բերձորում՝ «Ազատ Արցախը ողջունում է ձեզ» ցուցանակի մոտ ոստիկանները ծեծել են շարասյան անդամներին, եւ ինչպես վստահեցնում են վերջիններս՝ անգամ կանանց եւ երեխաների են բռնության ենթարկել: Այս մասին «Հիմնադիր խորհրդարանը» տեսանյութ է տարածել, սակայն անգամ այս տեսանյութը կասկածի տակ է առնվել. ասում են՝ «նախաձեռնության անդամներն իրենց սադրիչ գործողությունները մոնտաժել են»: Լեռնային Ղարաբաղի նախագահի աշխատակազմի ղեկավարի տեղակալ Դավիթ Բաբայանը «Ազատություն» ռադիոկայանին ասել է. «Հիմնադիր խորհրդարանի» անդամները պրովոկացիայի են ենթարկել ոստիկաններին»:
Գագիկ Գինոսյանը Արցախի ոստիկանությանն ու իշխանություններին հորդորում է ցուցադրել իրենց իսկ կողմից նկարահանվածը, քանի որ Արցախի ոստիկանության կողմից էլ տեսախցիկներով մարդիկ կային, եթե փաստեր ունեն, պարտավոր են ցուցադրել: «Միգուցե գնում էին սադրելու, միգուցե ես չգիտեմ՝ ինչ-ինչ ուժերի կողմից ուղղորդվող են, բայց քանի դեռ նրանք որեւէ հանցանք չէին գործել, որեւէ մեկն այս երկրում, քանի դեռ մեղք չի գործել, բացթողում չի արել, հակաիրավական քայլ չի արել, որեւէ մեկն իրավունք չունի կանխելու: Ես կուզենայի, որ մենք բոլորս հասկանանք, նաեւ այդ քայլին դիմողները, որ իրենք ուղղակի ոչ միայն մեղք են գործում ՀՀ քաղաքացիների դեմ, այլեւ մեղք են գործում իրենք իրենց դեմ, որովհետեւ նման վարքով մարդիկ շատ ավելի տկարանում են: Կարծում եմ՝ տվյալ դեպքում տուժողը շատ ավելի բարձր հոգեվիճակով է դուրս գալիս, թեկուզ ծեծված, ավելի ոգեղեն նոտայի վրա է դուրս գալիս»,- նկատեց ազատամարտիկը:
Կարդացեք նաև
Լավ կլիներ ոստիկանությունը, քաղաքական ուժերը նախ բանակցեին նախաձեռնության անդամների հետ, եւ, ինչպես ասաց Գինոսյանը՝ եթե լեզու չգտնեին, եւ իսկապես սադրանք լիներ, կամ հակաօրինական քայլ անեին, այդ դեպքում ոստիկանությունը հայտարարեր. «Այս մարդիկ չեն գնում երկխոսության, անկառավարելի են, ուզում են քանդել երկիրը եւ այլն: Բայց ոչինչ չկա, այս մարդիկ ուզում էին գնալ իրենց մտքերն արտահայտելու: Ցավոք, զինված կանգնել էին այդ մարդկանց դեմ: Չգիտեմ՝ ինչ նախադեպ ենք ստեղծում, բայց մենք ինչ-որ նոր բաներ ենք փորձում սադրել՝ առանց հասկանալու, կշռադատելու: Միգուցե այդ գործողությունները դատողության սահմաններից դուրս են գալիս, միգուցե նրանք փորձել են կանխել մի վատ բան, բայց այդ կանխումն ավելի վատ բաների է վերածվում: Չգիտեմ՝ ինչ էին ուզում կանխել, ինձ համար մութ է»:
Դավիթ Բաբայանը հայտարարել էր, որ Արցախի հանրության մեծ մասը դեմ էր «Հիմնադիր խորհրդարանին», եւ փաստորեն նրանց մուտքը ծեծուջարդով արգելելով՝ հանրության կամքն են արտահայտել: Այս պատճառաբանությունն, ըստ Գագիկ Գինոսյանի, որեւէ քննություն չբռնող վարկած է, եւ եթե Արցախի ամբողջ հասարակութունը դեմ է եղել, ապա թող այդ մարդիկ գնային շրջեին փողոցներում, տեսնեին, որ 10 հոգի է հավաքվել, թողնեին հետ գային:
Պարոն Գինոսյանը նկատեց, որ եթե խումբը գնում էր սադրելու, եւ կանանց ու երեխաներին էլ էին հետները տանում, ապա սա գուցեեւ անմեղության կանխավարկածն ապահովելու համար էր արված, գուցեեւ՝ բացթողում էր երեխաներին տանելը, եթե նախապես ծրագրել էին սադրել, գուցեեւ՝ իրոք, սադրելու մտադրություն չկար, քանի որ կին, երեխաների հետ էին:
«Եվ հետո՝ նրանց չեն կանխել Արցախում որեւէ գործողություն անելուց, նրանց կանխել են ՀՀ տարածքում: Ինձ համար ընդհանրապես գոյություն չունի 2 հանրապետություն հասկացություն, ինձ համար գոյություն ունի մեկ Հայաստան, մեկ Հայք, որը չպիտի ունենա ներքին սահմաններ: Այսինքն՝ եթե մենք մի օր Արեւմտյան Հայաստանն ազատագրելու ենք, մի հատ էլ Արեւմտյան Հայաստան պետությո՞ւն պիտի ունենանք, ու ռոմինգներ, անձնագրերում վիզաների կնիքնե՞ր դնենք: Այդպես տկարացնում ենք մեր ներուժը: Ես որպես ֆիզիկայի, մաթեմատիկայի եւ կիբերնետիկայի նախկին մասնագետ, ասեմ՝ 2 ալիքին եթե հնարավորություն չտաս գումարվելու, ինքը ռեզոնանսի չի գա, իսկ մեր երկիրը ռեզոնանսի պիտի գա երկու ուժերի գումարումով, իսկ մենք անընդհատ այդ ուժերը իրար դեմ ենք հանում: Միգուցե հենց այս ուժն է իրար դեմ հանողը, բայց այս ուժն, օրինակ՝ եթե սադրիչ ուժ է, թույլ տայիք թող այդ ուժն իր դիմակը պատռեր, գնար, տեսնեինք՝ սադրո՞ւմ է»: Գինոսյանի խոսքերով՝ այնուամենայնիվ, ինքը չգիտի, թե ինչ հեռահար նպատակներ ունի նախաձեռնությունը, եւ ինչ է թաքնված այդ լոզունգների հետեւում, որովհետեւ, ազատամարտիկի խոսքերով ասած՝ լոզունգը արտաքին շպարն է, ոչ ներքին շարժիչ ուժը, սա կարող է այլ երեւույթ լինել. ամեն դեպքում նրանք որեւէ մեկին չեն բռնացել, որեւէ մեկի սահմանադրական իրավունքը չեն խախտել:
«Գյումրիի դեպքերից հետո 2-րդ անգամ ամոթ ապրեցի մեր իրավապահ մարմինների համար: Ես, որպես հայ մարդ, կարծում եմ՝ մեզ հարիր չէ, որպես ազատ մարդ, որպես ազատ երկրի ազատ հոգու տեր, ազատ ազգ, որն իր ամբողջ կենսագրության ժամանակ տուժել է օտարի ձեռքից՝ իր ազատամտության եւ ազատատենչության համար, եւ հիմա մենք տուժում ենք մեր ձեռքից»,- ասաց ազատամարտիկը:
ՆԵԼԼԻ ԲԱԲԱՅԱՆ
«Առավոտ» օրաթերթ
03.02.2015
«Գյումրիի դեպքերից հետո 2-րդ անգամ ամոթ ապրեցի մեր իրավապահ մարմինների համար: »
—————————————————————-
Ցեղասպանութիւնը ներքաղաքական գործիքի վերածելէ ետք, ուրեմն ահա, հիմա ել՝ ծեծվրտուք մը համազոր են նկատում Կիւմրիում պատահած հրեշութեան, համայն ընտանիքի մը սպանդին, նորածինի մը տառացի մորթվելուն…
եթէ ձեզ պէս սկսենք խոսել, զառանցել, ասելու ենք՝ ձեր կարծեցեալ մասնակցութեամբ ազատագրուած հողերն ալ հարամ են, երեւի, աւել լաւ կը լինէր որ մնային թուրքին ձեռքը… բարեբախտաբար, շատ էք չափազանցում այդ նիւթում ձեր յարաբերական վաստակն ու կարեւորութիւնը…
լոկ օրինակ եմ տալիս, պարզաբանելու համար թէ որքան ապիկար, զզուելի կերպով էք արտայայտվում…
https://www.youtube.com/edit?action_reinstate=1
որպեսզի հեղինակին պարզ լինի առաջարկում եմ լսել ՆԳՆ մամլո խոսնակի բացատրությունը կատարվածի մասին
Շնորակալություն: Ամբողջովին արտահայտեցիք իմ մտքերը :Քանի-որ հրահանգը տրված է ամենավերևից, այդ իսկ պատճառով Հայաստանի ոչ-մի պաշտոնյա /իրավասու/ չի պահանջում և պաշտպանում իր քաղաքացու իրավունքները: Հետևությունները թողնում եմ բոլորիս..
Ցանկացած միջոցառման ժամանակ, երբ կազմակերպիչները կամավորության սկզբունքով դրան ներգրավում են կանանց ու երեխաների,դրանով նրանք ընդգծում են իրենց միջոցառման խաղաղ նպատակը:Ցավալի է,որ պ-ն Գինոսյանը այս պարզ ճշմարտությունը չգիտի:
Հարգելի ընթերցողներ, ես նյութի հեղինակ եմ, պետք է ասեմ, որ սխալմունք է տեղի ունեցել, Գագիկ Գինոսյանի արտահայտած միքտը ես սխալ եմ հասկացել: Հոդվածն ամբողջությամբ ընթերցելու դեպքում, պարզ է դառնում, որ Գագիկ Գինոսյանը նկատի ունի, որ եթե «Հիմնադիր խորհրդարանը» կանանց եւ երեխաների հետ է գնացել, ապա դրանով ցույց է տվել, որ գնում են խաղաղ նպատակներով, եւ խաղաղ միջոցառման: Վերնագիրն ինքս եմ ընտրել, եւ այն սխալ է արտահայտել Գինոսյանի մտքերը: Դա իմ սխալմունքն է, ինչի համար ներողություն եմ խնդրում: Վաղը մեկ այլ նյութով կհրապարակվի ուղղումն այս նյութի վերաբերյալ: նորից ներողություն եմ խնդրում ընթերցողներից, եւ հատկապես Գագիկ Գինոսյանից:
եսքան իրար անցնելու բնաւ պէտք չունես, Նելլի ջան, որովհետեւ վերնագիրդ իրականութիւն է, թէ Գագիկը այդպէս ըսած լինի կամ ոչ
կիներով եւ պուճուրներով եդպիսի խանգարիչ ու գրգռիչ գործողության մը ձեռնարկելը կամ անգիտակցություն է, ծնողական ծանր սխալ, կամ ել իրոք զանոնք, գոնէ բնազդաբար, որպէս «մարդկային վահան» օգտագործելու ջանք կար…
նաեւ ասեմ թէ ըստ երեւոյթին միայն Առավոտը մտասեւեռում ունի այս մանր դիպուածի վրայ, եւ շարունակում է եսքան ձայն տալ այս աննշան մոլորեալներին, մինչ մնացեալ Հայոց Աշխարհը արդէն շարունակում է իր ճամբան, եւ զբաղվում է շատ աւել լուրջ եւ կարեւոր նիւթերով
ԺՈՂՈՎՐԴԱՎԱՐ ԱԽՊԵՐՈՒԹՅՈՒՆ ԾԱՆՈԹԱՑԵՔ ԵՒ ԱԿԱՋՆԵՐԻԴ ՕՂ ԱՐԵՔ, ԱՅՍ ՁԵՐ ՄԵՂԱԴՐԱԿԱՆՆ Է, ՈՐԸ ՎԱՂԵՄՈՒԹՅԱՆ ԺԱՄԿԵՏ ՉՈՒՆԻ https://www.nt.am/am/news/195553/
ՀՀ ՍԱՀՄԱՆԱԴՐՈՒԹՅՈՒՆ https://www.facebook.com/AzatHayk/photos/pb.464345153620882.-2207520000.1423089149./511704328884964/?type=3&theater
Հայ ժողովուրդը, հիմք ընդունելով Հայաստանի անկախության մասին հռչակագրում հաստատագրված հայոց պետականության հիմնարար սկզբունքները եւ համազգային նպատակները, իրականացրած ինքնիշխան պետության վերականգնման իր ազատասեր նախնիների սուրբ պատգամը, նվիրված հայրենիքի հզորացմանը եւ բարգավաճմանը, ապահովելու համար սերունդների ազատությունը, ընդհանուր բարեկեցությունը, քաղաքացիական համերաշխությունը, հավաստելով հավատարմությունը համամարդկային արժեքներին, ընդունում է Հայաստանի Հանրապետության Սահմանադրությունը:
Հոդված 1. Իշխանության յուրացումը որեւէ կազմակերպության կամ անհատի կողմից հանցագործություն է:
Հոդված 11.3. Հայաստանի Հանրապետության քաղաքացիները Հայաստանի Հանրապետության տարածքում եւ նրա սահմաններից դուրս գտնվում են Հայաստանի Հանրապետության պաշտպանության ներքո:
Ազգությամբ հայերը Հայաստանի Հանրապետության քաղաքացիություն են ձեռք բերում պարզեցված կարգով:
Հոդված 49. Հանրապետության Նախագահը Հայաստանի Հանրապետության անկախության, տարածքային ամբողջականության եւ անվտանգության երաշխավորն է:
https://www.facebook.com/AzatHayk/posts/771107469611314