Այս տարի տեղումները սակավ են, ինչը այնքան էլ լավ չէ հողագործությամբ զբաղվողների համար: Ագրարագյուղացիական միավորման նախագահ Հրաչ Բերբերյանն այսօր «Հենարան» ակումբում ասաց, որ եթե եղանակն այսպես շարունակվի, եւ սկսվի բողբոջակալումը, ծաղկակալումը, ապա վաղ ծաղկակալում կլինի, ինչը պտղաբուծությանը մեծ վնաս կհասցնի. «Եթե մի քիչ ցրտեց եղանակը, պրոցեսը կկանգնի: Աստծուց է կախված, ոչ ոքից կախված չէ, Կարծում եմ, որ փետրվարը ավելի ցուրտ կլինի, եւ էս եղանակը իմ կենսագրության մեջ 2-3 անգամ եղել է, բնությունը կոմպենսացնում է ինքն իրեն, մի փոքր էլ ցրտի ամեն ինչ լավ կլինի: Մեր փորձը ցույց է տալիս, որ մենք փետրվարին կունենանք տեղումներ, որոնք մեր ջրամբարները ջրազուրկ չեն թողնի, այսօր իրոք ջրի պրոբլեմ ունենք ջրամբարներում, բայց կարծում եմ փետրվար-մարտին կլցվեն եւ որեւէ աժիոտաժ չեմ տեսնում ոռոգման ջրի սակավության հետ կապված»:
Հրաչ Բերբերյանի խոսքերով` գյուղացիները խուսափում են լոլիկ, բադրիջան եւ պղպեղ մշակել, ինչը շատ մտահոգիչ է. մասնագետը կոչ է անում սկսեն ավելի շատ այս մշակաբույսերի ցանքատարածություններն ավելացնել. «Լոլիկը շահութաբեր է, խորհուրդ կտամ անցնել մեր տրադիցիային` բանջարաբուծությանը»:
Անդրադառնալով Արարատյան դաշտավայրում ֆիլոքսերա վարակի տարածմանը, որի հետեւանքով մոտ 9 հեկտար խաղողի այգիներ պետք է հիմնահատակ ոչնչացվեն, Բերբերյանն, այդ գյուղացիներին հորդորեց այլ տարածքներում հողագործությամբ զբաղվեն. «Էնքան պարապ-սարապ հողեր կան, թող գնան վարձակալեն ու մշակեն, կառավարությունից էդ փոխհատուցման փողերն էլ դնեն վարձակալմանն ու մշակմանը»:
Aravot.am-ի դիտարկմանը, որ այս գյուղացիներն իրենց հողերն ունեն, որոնք ոչ իրենց մեղքով վարակվել են, ինչո՞ւ պիտի այլ տեղեր հող վարձակալեն, Բերբերյանն, ըստ էության, չպատասխանեց, ասաց` «Թող վարակված արմատակալներ չբերեին գյուղացիները»:
Կարդացեք նաև
Մենք Բերբերյանին հիշեցրեցինք, որ ֆիլոքսերա վարակակիրը, ինչպես «Առավոտի» հետ զրույցում վստահեցրել էին գիտաշխատողները, վարակակիրը տարածվում է հողի, օդի, քամու եւ ջրի միջոցով, այնպես որ գյուղացիները վարակակիր արմատակալներ չեն տնկել, ինչի հետեւանքով էլ այգիները վարակվել են: Այս առնչությամբ Բերբերյանն ասաց` «Ուրեմն կարանտինն են վատ արել, 5-6 տարի առաջ ասել էինք, կառավարությունը բանի տեղ չդրեց, հիմա են սկսել աշխատել, որ շուտ անեին, էս վիճակը չէր լինի»:
Մանրամասն` տեսանյութում
Բերբերյանը խոսեց նաեւ գյուղացիների վարկային խնդիրներից, վստահեցնելով, որ բանկերը գյուղացիներին դրամով վարկեր չեն տալիս:
Ագրարագյուղացիական միավորման նախագահը տեղեկացրեց, որ մի քանի կազմակերպություններով դիմել են ՀՀ վարչապետին, որպեսզի վերադարձ արվի մեկնարկային ներմուծման ռեժիմին, այսինքն` 2011 թվականին հարկերից ազատվել են թունաքիմիկատներ, պարարտանյութեր, գյուղգործիքներ, սերմեր ներմուծողները: «Այս ցանկը կրճատվել է կապված Եվրասիական տնտեսական միության հետ, կարծում եմ մեր մասնագետները վատ են աշխատում, որովհետեւ ցորենի, գարու, կարտոֆիլի վրա ավելացված արժեքի հարկ (ԱԱՀ) չկա, բայց լոլիկի ու վարունգի սերմերի վրա կա:
Թունաքիմիկատները ԱԱՀ-ից հանել են, բայց քիչ քանակությամբ սպեցիֆիկ թունաքիմիկատները ԱԱՀ-ի տակ են ընկել: Սա ազդելու է ինքնարժեքի վրա, եթե բարձրացնեն շուկայում տեղ չենք ունենա: Առանց այն էլ տրանսպորտային ծախսերը ինքնարժեքի վրա ազդում են: 2013-14 թվերին ռեկորդային քանակությամբ կարտոֆիլ ենք արտահանել, հիմա եթե ինքնարժեքը բարձրանա, այդ շուկաներում տեղ չենք ունենա»:
Նելլի ԲԱԲԱՅԱՆ
կոմպենսացնել = ՓՈԽՀԱՏՈՒՑԵԼ
պրոբլեմ = ԽՆԴԻՐ
աժիոտաժ = ԻՐԱՐԱՆՑՈՒՄ
բադրիջան = (ցանկալի է) ՍՄԲՈՒԿ
տրադիցիա = ԱՒԱՆԴՈՅԹ
սպեցիֆիկ = ԻՒՐԱՅԱՏՈՒԿ
Մի լրացում՝ պրոբլեմը միշտ չէ, որ խնդիր է թարգմանվում: Երբեմն նաեւ հիմնահարց՝ ըստ համատեքստի
Լիովին համամիտ եմ 🙂
Էս ժողովուրդն ինչքա՜ն մեղկ է:
Իր երկրում իր իսկ ազգային արժոյթով վարկ չեն տալիս: Արտարժոյթով էլ վարկ են տալիս, փոխարժէքը արհեստական տատանում ու գիւղացուն հաշուած րոպէների ընթացքում սնանկացնում:
21-րդ դարում ասում է՝ «Աստծուց է կախուած» 🙂
Հիմա Աստուած վերեւից ծիծաղում է սրանց վրայ,,