Մամուլի ազգային ակումբն այսօր՝ փետրվարի 18-ին, «Աշխարհը և մենք» ծրագրի շրջանակներում հյուրընկալել էր ՀՀ-ում Ուկրաինայի արտակարգ և լիազոր դեսպան Իվան Կուխտային: Դեսպանը խոսեց Ուկրաինայում իրավիճակի եւ հնարավոր զարգացումների մասին:
Պարոն Կուխտան փաստեց, որ չնայած Մինսկում Նորմանդական քառյակի հանդիպմանը, Լուգանսկում մարտերը չեն դադարում: Նաեւ արձանագրեց, որ Մինսկյան համաձայնագիրը փաստորեն ուժը կարող է կորցնել ու այնպիսի կառույցներ, ինչպիսիք են ՆԱՏՕ-ն, ՄԱԿ-ը, ԵԱՀԿ-ն, պետք է ջանքեր ներդնեն կոնֆլիկտը լուծելու համար:
ՀՀ-ում Ուկրաինայի դեսպանը հայտարարեց, որ Ռուսաստանի կողմից շարունակում են վարձկաններ կռվել եւ զինվել այդ երկրի աջակցությամբ, ու նրա ձեւակերպմամբ, Ուկրաինան էլ որպես անկախ երկիր պարտավոր է անել այնպես, որ իր երկրի մարտունակությունը լինի հավուր պատշաճի:
«Ռուսաստանը գերժամանակակից զենք է մատակարարում զինյալներին, մինչդեռ ռուսական ԶԼՄ-ները ցույց են տալիս ու մեկնաբանում, թե իբր կռվում են ածխահատները, բայց դժվար է պատկերացնել՝ թե ինչպե՞ս կարող է ածխահատը ձեռք բերել ժամանակակից զինվորական հանդերձանք եւ նման զինամթերք»,-տարակուսանք հայտնեց Իվան Կուխտան:
Կարդացեք նաև
Լրագրողի հարցին՝ ռազմական առումով կա՞ ուկրաինա-ադրբեջանական փոխգործակցություն, դիվանագետը պատասխանեց, որ իր երկիրը վաղուց Ադրբեջանի հետ տնտեսական համագործակցություն ունի: «Մնացածից տեղյակ չեմ, ես Հայաստանում Ուկրաինայի դեսպանն եմ»,-հավելեց նա:
Իսկ պատրաստվո՞ւմ է Ուկրաինան հրաժարվել ռուսական գազից: Այս հարցի առնչությամբ էլ դեսպանը պատասխանեց, որ ԽՍՀՄ շրջանից սկսած, նաեւ անկախության տարիներից Ուկրաինան 90 %-ով կախված է եղել ռուսական գազից: Դեսպանի բառերով, այսօր այդ հանգամանքը շարունակվում է ծառայեցվել իբրեւ ճնշման գործիք, ու Ուկրաինան զուգահեռաբար փորձում է այլընտրանքային աղբյուրներ փնտրել էներգիայի ու էներգակիրների առումով:
Ապրիլի քսանչորսին Ուկրաինայի նախագահը կլինի՞ Երեւանում՝ հետաքրքրվեց լրագրողներից մեկը: «Մենք ստացել ենք հրավեր Հայաստանի Հանրապետության նախագահի կողմից՝ մասնակցելու Օսմանյան Թուրքիայի կողմից իրականացված ոճրագործության զոհերի 100-ամյա տարելիցին: Երկրի ղեկավարությունն այժմ քննարկում է հարցը, ինչի մասին անպայման կտեղեկացնենք»,-պատասխանեց պարոն Կուխտան:
Անդրադառնալով Հայաստանի եւ Ուկրաինայի միջեւ ապրանքաշրջանառությանը, նա ափսոսանքով նշեց, որ ապրանքաշրջանառության ծավալները կրճատվել են, ինչը պայմանավորեց համաշխարհային տնտեսական ճգնաժամով, նաեւ հույս հայտնեց, որ ՀՀ-ի ՝Եվրասիական տնտեսական միության անդամակցությունը ու Ուկրաինայի՝ ԵՄ ուղղվածությունը կնպաստեն երկրու երկրների տնտեսական խնդիրները հաղթահարելուն:
Մանրամասները՝ տեսանյութում
Գոհար ՀԱԿՈԲՅԱՆ
