Հայաստանի կոմպոզիտորների եւ երաժշտագետների միության նախագահ Արամ Սաթյանն ընդգրկված չէ Ցեղասպանության հարյուրամյա տարելիցի միջոցառումների հանձնաժողովում: Aravot.am-ի հետ զրույցում ասում է, որ մի շարք առաջարկներ է արել ՀՀ մշակույթի նախարարին, Արա Աբրահամյանի ֆոնդին ու ցեղասպանության տարելիցի հետ առնչություն ունեցող բոլոր կառույցներին, սակայն ոչ մի արձագանք չի ստացել: «Կարծում եմ, որ պետք էր վաղուց նոր ստեղծագործությունների մրցույթ հայտարարվեր ՝ երաժշտության ոլորտում: Ես նման առաջարկ արել եմ դեռեւս անցյալ տարվա մարտին:
Ինչ էլ որ արել ենք, ինքնուրույն ենք արել: Կոմպոզիտորների միությունը փորձում է իր պրոբլեմները լուծել, ինչը հեշտ չէ, որովհետեւ միությունը հասարակական կազմակերպություն է, բայց մենք աշխատում ենք, որ պուլսը զգացվի, չենք կարող անտարբեր լինել, նաեւ անընդհատ խոսում ենք, ահազանգում: Կոմպոզիտորների միությունն իր ծրագիրն է անում, բայց հանձնաժողովի մեջ ո՛չ նախագահը, ոչ էլ միության անդամները ներառված չեն: Կոմպոզիտորների միության հետ որեւէ քննարկում չի եղել:
Մենք ցանկանում էինք փառատոն անել, որտեղ հնչեին այն գործերը, որոնք գրված էին հատուկ այդ թեմայով՝ կոնտատներ, սիմֆոնիկ գործեր… Մի խոսքով, բավականին մեծ աշխատանք է տարվել, հավաքել ենք հայ կոմպոզիտորների նյութերը, տեղյակ ենք, թե ինչ է կատարվում Ռուսաստանում, Միացյալ նահանգներում: Փառատոն ենք անում Ֆրանսիայում, ԱՄՆ-ում, բոլոր այն երկրներում, որտեղ կա այդ անմոռուկի էմբլեման, բայց դա մեր նախաձեռնությունն է, մեզ ոչինչ չեն ասել»,- հայտնեց կոմպոզիտորը:
Գոհար ՀԱԿՈԲՅԱՆ
Կարդացեք նաև
Լուսանկարը՝ Արամ Սաթյանի ֆեյսբուքյան էջից
Այս տարի ոչ միայն Ցեղասպանության 100-ամյակն է լրանում, այլև` Հայրենական մեծ պատերազմի 70- ամյակը, որը, մեր ժողովուրդի համար, ոչ պակաս կարևոր տարելից է: Եկեք չմոռանանք նաև այս տարելիցը … Հարգանքով` Աշոտ Բաբայան