Կտավատի օգտակար հատկությունների մասին շատ է խոսվում. Եվրոպայի լավագույն կենսաքիմիկ, բժիշկ Ջոաննա Բադվիգը նույնիսկ մշակել էր կտավատի ձեթով ու կաթնաշոռով քաղցկեղից բուժվելու իր բաղադրատոմսը: Այս ձեթը հատկապես օգտակար է սառը մզման ենթարկած, չզտված տարբերակով: Խորհուրդ է տրվում այն պահպանել 20 օրից ոչ ավելի, քանի որ օգտակարությունը թուլանում է, իսկ մինչեւ այդ էլ ամեն օր մի քանի անգամ տարան շրջել վերեւ-ներքեւ:
Կտավատի ձեթը պարունակում է օմեգա 3 դասի ճարպեր եւ բջջանյութեր, հեշտ յուրացվում է եւ ալերգիա չի առաջացնում: Հարուստ է կալիումով, վիտամին E-ով, ամինաթթուներով եւ հանքանյութերով: Ինչպես ձեթը, այնպես էլ կտավատի սերմերը օգտագործվում են մի շարք հիվանդությունների բուժման նպատակով: Կտավատի սերմերը լավացնում են երիկամների, լյարդի, վահանագեղձի եւ ստամոքս-աղիքային ուղու աշխատանքը, պաշտպանում թրոմբոզից, նվազեցնում սրտանոթային եւ քաղցկեղային հիվանդությունների զարգացման ռիսկը: Կտավատի սերմերն օժտված են նաեւ երիտասարդացնող եւ հակամանրէային հատկությամբ, իսկ սերմերից ստացված թուրմը ունի խորխաբեր, լուծողական եւ հակաբորբոքային ազդեցություն:
Տարիքի հետ առաջացող հիվանդությունների կանխարգելման նպատակով խորհուրդ է տրվում 10 օր առավոտյան ուտելուց 30 րոպե առաջ խմել 1 ճաշի գդալ չզտված կտավատի ձեթ, այնուհետեւ ընդմիջել 2 շաբաթով եւ դարձյալ կրկնել: Ցանկալի արդյունքի համար այս կուրսը կրկնել 3-4 անգամ:
Բուժական նպատակով կտավատի ձեթը խմել առավոտյան սոված փորին՝ 1 թեյի գդալ, հետեւից՝ 1 բաժակ տաք ջուր: Երեկոյան նույնը կրկնել ընթրիքից հետո եւ 1 գդալ ձեթ օրվա ընթացքում օգտագործվող մթերքների, աղցանների հետ:
Կարդացեք նաև
Կարող եք հետեւել նաեւ տիկին Բադվիգի առաջարկվող բաղադրատոմսին՝ 2 ճաշի գդալ էկոլոգիապես մաքուր կտավատի ձեթը խառնել 100-150 գրամ կաթնաշոռի հետ, խառնել այնքան, մինչեւ ստացվի համասեռ զանգված եւ օգտագործել օրը 1 անգամ:
Այդ ընթացքում բացառեք տապակած մթերքը եւ յուղոտ կաթնամթերքը, ինչպես նաեւ խոզի միսը, պահածոյացված մթերքները, քիմիական հավելումներով եւ համային արժեքներ պարունակող մթերքները:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ» օրաթերթ
10.03.2015
I couldn’t be happier!
I am so proud of you Anush Matevosyan