«Ւնձ համար կարևոր էր հանդիպել մարդկանց հետ, այլ ոչ միայն քաղաքական գործիչների, քանի որ խորհրդարանական դիվանագիտությունը մարդկանց հետ հարաբերություններն են»,-այսօր, ապրիլի 13-15-ը ՀՀ այցի շրջանակներում, ՀՀ ԱԺ-ում հրավիրված ասուլիսին հայտարարեց ԵԽԽՎ նախագահ Անն Բրասյորը:
Նա նշեց, որ հանդիպումներ է ունեցել ՀՀ բարձրաստիճան պաշտոնյաների հետ և քննարկել ԼՂՀ հակամարտության կարգավորման և «զանգվածային սպանությունների» հետ կապված հարցերը:
Դառնալով ԼՂ հակամարտության կարգավորմանը՝ տիկին Բրասյորն ասաց. «ԼՂ հակամարտության կարգավորումը լուրջ մտահոգություն է նաև մեզ համար, այստեղ խոսքը ԼՂ 47 երկրների մի մաս կազմող ժողովուրդների ճակատագրերի մասին է: Միակ լուծումը պետք է տեսնել երկխոսության միջոցով: Բռնությունն ընդունելի է: ԵԽԽՎ-ն մշակելու է զեկույց ԼՂ հակամարտության վերաբերյալ և դրա պատրաստման նպատակը ոչ թե Մինսկի խմբի գործընթացներին միջամտելն է, այլ լուծումներ որոնելու և գտնելու գործընթացին նպաստելը: Հույս ունենք, որ հայկական կողմն ակտիվորեն կմասնակցի զեկույցի պատրաստման գործին, որպեսզի զեկույցն ապահովի հավասարակշռված մոտեցում»:
Անդրադառնալով Հայոց ցեղասպանությանը՝ ԵԽԽՎ նախագահն ասաց. «Ջարդերն անընդունելի են և պիտի անենք ավելին, որ նրանք այլևս երբեք չկրկնվեն: Առաջին աշխարհամարտից հետո մեր նախնիներին հաջողվեց կանգնեցնել պատերազմը, բայց չհաջողվեց ապահովել խաղաղություն: Եթե չկարողանանք հաշտվել անցյալի հետ, չենք էլ կարողանա կառուցել խաղաղ ապագա: Հարյուրամյակին նվիրված միջոցառումները կարևոր են անցյալը, զոհվածներին հիշելու տեսանկյունից: Պետք է ընդհանուր հայտարարի գանք, որ այլևս չկրկնվեն նման ջարդերը»:
Կարդացեք նաև
Տիկին Բրասյորն, անդրադառնալով ՀՀ-ում ընթացող սահմանադրական փոփոխություններին, նշեց. «Այն, անշուշտ, քաղաքական ընտրության արդյունք է: Նման ընտրության շրջանակներում կարևոր է ապահովել մեծամասնության լիարժեք համակարծությունը: Մեծամասնություն ունենալը կարևոր է, բայց համակարծություն ունենալը ևս կարևոր է»:
ԵԽԽՎ նախագահն անդրադարձավ նաև կանանց դեմ բռնության պայքարին ու հիշեցրեց, որ ՀՀ-ն չի ստորագրել կանանց դեմ բռնության պայքարի կոնվենցիան:
Նկատելի էր, որ Անն Բրասյորի դաստակը վնասված է, այն կապված էր: Զարմացական հայացքներին ի պատասխան՝ ԵԽԽՎ նախագահը պարզաբանեց.
«Սա սպորտի բերումով պատահար է, այլ ոչ քաղաքական: Քաղաքական պայքարում ներքաշվում եմ, բայց չեմ օգտագործում բռունցքներս»:
Տաթև ՀԱՐՈՒԹՅՈՒՆՅԱՆ
