«Մենք անպայման հետամուտ ենք լինելու, որ մարդիկ, որոնց պատճառով եղել են գազի կորուստները, մարդիկ, որոնց գրպանները հարստացել են այդ կորուստներով, անկախ իրենց նախկինում եւ այսօր զբաղեցրած դիրքից, անպայման պատասխանատվության ենթարկվեն»,- Aravot.am-ի հետ զրույցում հայտարարեց ԲՀԿ նախագահ Նաիրա Զոհրաբյանը:
Թե ինչպես է ԲՀԿ-ն պատրաստվում պատասխանատվության կանչել գազի ոլորտում չարաշահումներ թույլ տված պաշտոնյաներին, առայժմ հայտնի չէ:
«Մենք դա դեռ կքննարկենք մեր գործընկերների հետ: Միգուցե դատախազություն դիմենք, միգուցե այլ ֆորմատով: Այս պահին չեմ կարող ասել, թե քննարկումների արդյունքում ինչ եզրահանգման կգանք»,- ասաց Նաիրա Զոհրաբյանը:
Նրա խոսքերով՝ «Այն, որ ԱԺ գազի հանձնաժողովն ինքն էլ արձանագրել է, որ գազի ոլորտում եղել են լրջագույն կորուստներ, եւ այդ կորուստները լրջագույն եկամուտներ են ապահովել ինչ-ինչ անձանց համար՝ սա փաստ է: Այս փաստի հետեւից պետք է անպայմանորեն գնանք»:
Կարդացեք նաև
Մեր հարցին՝ այլեւս չկա՞ համագործակցություն խորհրդարանական 3 ուժերի միջեւ, որովհետեւ նույն գազի հանձնաժողովի զեկույցի քննարկման ժամանակ հանձնաժողովի աշխատանքների մասին ՀԱԿ-ն այլ կարծիք էր հայտնում, ԲՀԿ-ն այլ, Ժառանգությունը՝ այլ՝ Նաիրա Զոհրաբյանը պատասխանեց. «ԲՀԿ-ն ասել է՝ մենք բաց ենք բոլորի հետ համագործակցության համար: Մենք չունենք որեւէ խնդիր՝ որեւէ քաղաքական ուժի հետ համագործակցելու կամ չհամագործակցելու, եթե տվյալ պահին, ասենք, տվյալ հարցի վերաբերյալ մեր մոտեցումները, մեր շեշտադրումները կլինեն համադրելի: Օրինակ, մենք առաջարկեցինք եզդիների հետ կապված առաջարկ եւ շատ ողջունում ենք, որ բոլոր քաղաքական ուժերը դրան միացան: Իրենք կներկայացնեն որեւէ առաջարկ, որը մենք կտեսնենք ռացիոնալ, որը բխում է այն մոտեցումներից, որը բարձրացրել է ԲՀԿ-ն, անկախ նրանից, թե դա որ քաղաքական ուժը ներկայացրած կլինի, ԲՀԿ-ն անպայմանորեն կմիանա դրան»:
Հռիփսիմե ՋԵԲԵՋՅԱՆ
ինծ թվում է թե Պարոն Ծառուկյանն ել ինչ-որ գազի խնդիրներ ունի… հաւանաբար ուտելիքի կապված է… ասում են՝ ածուխի դեղահատները ազդու դարման են…