Այս տորթն իսկապես այնքան համեղ է, որ ամեն կտորը վայելելիս քեզ դրախտում ես զգում: Եվ համով շատ նման է բոլորի կողմից սիրված շոկոլադին: Ամենակարեւորը՝ չափազանց հեշտ է պատրաստվում:
Անհրաժեշտ մթերքները
Խմորի համար
3 ձու
Կարդացեք նաև
1 բաժակ շաքարավազ
100 գրամ կարագ
200 գրամ թթվասեր
1 թեյի գդալ սոդա
1 բաժակ ալյուր
3 լիքը ճաշի գդալ կակաո
Կրեմի համար
150 գրամ կոկոսի քերուկ
1 բաժակ կաթ
100 գրամ շաքարավազ
100 գրամ կարագ
2 ճաշի գդալ կոկոսի լիկյոր (սա կարելի է փոխարինել ռոմով կամ կոնյակով, կամ ուղղակի բաց թողնել)
1 ճաշի գդալ վանիլի էքստրատ (կարող եք փոխարինել մի պտղուց վանիլի փոշիով)
1 ճաշի գդալ եգիպտացորենի կամ կարտոֆիլի օսլա
Գլազուրի համար
1 բաժակ շաքարավազ
3 լիքը ճաշի գդալ կակաո
1/3 բաժակ կաթ
50 գրամ դառը սեւ շոկոլադ
50 գրամ կարագ
Պատրաստման եղանակը
Սկզբում պատրաստել կրեմը: Կաթսայի մեջ լցնել կաթը, շաքարավազը, կոկոսի քերուկը եւ կարագը, դնել կրակին: Պարբերաբար խառնել: Սուրճի բաժակի մեջ մեկ գդալ օսլան լավ խառնել 1-2 գդալ ջրի հետ, եւ ավելացնել կրեմին, հենց վերջինս սկսի եփվել: Խառնել, հենց զգաք, որ արդեն պնդանում է, ավելացրեք վանիլի էքստրատը եւ կոկոսի լիկյորը եւ անջատեք: Թողեք լրիվ սառչի: Այդ ընթացքում պատրաստեք խմորը:
Շաքարավազն ու ձուն շատ լավ հարել, ավելացնել հալված կարագը, թթվասերը՝ սոդայով, շարունակել հարել, ավելացրեք կակաոն եւ ալյուրը: Պետք է ստացվի թույլ բիսկվիթային խմոր: Եփեք 180 աստիճան տաքացրած ջեռոցում մոտ 40 րոպե, պարբերաբար ստուգեք պատրաստվածության աստիճանը փայտիկով:
Անջատելուց հետո եւս կես ժամ թողեք ջեռոցում, ապա հանեք եւ ջեռոցի ցանցի վրա թողեք սառչի:
Երբ խմորն ամբողջովին սառչի, կիսեք երկու մասի: Առաջին կտորի վրա լցրեք սառած կրեմը, փակեք երկրորդ կտորով:
Անցնենք գլազուրին: Այն պատրաստելու համար շաքարավազն ու կակաոն լցրեք կաթսայի մեջ, լավ խառնեք, գդալ-գդալ ավելացրեք կաթը եւ խառնեք, պետք է դառնա բավականին պինդ խմորի նման զանգված, եթե զգաք քիչ է կաթը, մեկ գդալ էլ ավելացրեք: Դրեք կրակին եւ անընդհատ խառնեք, երբ սկսի եփվել, անջատեք եւ անմիջապես մեջը գցեք կես տուփ շոկոլադը՝ կտրատած վիճակում եւ կարագը, շարունակեք արագ-արագ խառնել, որպեսզի շոկոլադն ու կարագն ամբողջությամբ լուծվեն:
Տաք-տաք վիճակում գլազուրը լցրեք տորթի վրա եւ ամբողջությամբ պատեք տորթը դրանով: Դրեք սառնարանը առնվազն 5-6 ժամով, որից հետո վայելեք:
Բարի ախորժակ:
