Եփված խմորով կարելի է պատրաստել ոչ միայն պրոֆիտրոլներ, էկլերներ, այլեւ տորթեր: Այս տորթը պատրաստելու համար պարզապես պետք է պատրաստել եփված խմոր, որը ոչ թե հատիկով էկլեր կամ պրոֆիտրոլ կդառնա, այլ ամբողջական տորթ: Վրան էլ քսում ենք մեր նախընտրած կրեմը եւ զարդարում ելակով: Բայց առաջարկում եմ ավելի հարուստ համ ստանալու համար նախապես պատրաստել նաեւ ելակի կուլի:
Անհրաժեշտ մթերքները
Խմորի համար
Ջուր- 1 բաժակ, մոտավորապես 150-200 գրամ
Կարդացեք նաև
Կարագ- 100-150 գրամ
Ալյուր- 1 բաժակ (ճիշտ նույն բաժակով, ինչ ջուրը)
Աղ- 1 պտղունց
Հավկիթ-5-6 հատ
Կրեմի համար
Կաթ- 0,5 լիտր
Շաքարավազ-1 բաժակ
Վանիլի մզվածք- 1 թեյի գդալ (կարող եք ձոխարենը վերցնել 1 տուփ վանիլային շաքարավազ կամ 1 պտղունց բյուրեղացված վանիլին)
Ձվի դեղնուց-3 հատ
Եգիպտացորենի օսլա-2 ճաշի գդալ
Սերուցք՝ ոչ պակաս, քան 30 տոկոս յուղայնության- 0,5 լիտր
Ելակով կուլիի համար
Ելակ-500 գրամ
Շաքարավազ – 2-3 ճաշի գդալ
Պատրաստման եղանակը
Խմորը պատրաստելու համար եռացնում եք կարագով ջուրը, որի մեջ աղ է արված, ապա անմիջապես ավելացնում եք ալյուրը, կրակը դարձնում շատ մարմանդ: Խմորը անընդհատ խառնելով եփում եք այնքան, մինչեւ սկսվի գնդի տեսքով առանձնանալ կաթսայի պատերից: Դա տեւում է 3-7 րոպե, ոչ ավելին:
Հենց եփված խմորը սառչի այնքան, որ մատը առանց վառելու կարողանաք մտցնել խմորի մեջ, կարող եք ավելացնել հավկիթները: Անպայման՝ հատիկ- հատիկ: Ամեն հատն ավելացնելուց հետո լավ խառնեք խմորը, մինչեւ ամբողջությամբ լուծվի մեջը, ապա նոր ավելացրեք հաջորդը: Երբ տեսնեք, որ ստացվել է դանդաղ ծորացող, գրեթե անփայլ, բայց շատ գեղեցիկ զանգված, ուրեմն խմորը պատրաստ է:
Ջեռոցը պետք է նախապես տաքացնել 220 աստիճան: Խմորը ձեր ուզած տեսքով լցրեք ջեռոցի տապակի մեջ, որի վրա յուղաթուղթ է փռված: Դրեք լավ տաքացրած ջեռոցը՝ սկզբում 220 աստիճանում պետք է թխվի մոտ 15 րոպե, երբ կզգաք, որ լավ բարձրացել եւ թեթեւակի կարմրել է, իջեցրեք ջերմաստիճանը մինչեւ 160 աստիճան, եւ թողեք եւս մոտ կես ժամ, որ խմորը լավ չորանա:
Մինչ խմորը պատրաստվում է, պատրաստեք նաեւ ելակով կուլին եւ կրեմը:
Կուլին իրենից ներկայացնում է շաքարով տրորված, բայց շատ կարճ, մոտ 5 րոպե եփված, ապա մաղով անցկացրած, քամած հատապտղային թանձրուկ: Տվյալ դեպքում մենք պատրաստում ենք ելակով կուլի, սակայն կարող եք պատրաստել նաեւ ազնվամորիով կամ մոշով, եւ ձեւավորել տորթը նույնպես ազնվամորիներով կամ մոշով:
Լցրեք ելակի վրա շաքարավազը, թողեք մի որոշ ժամանակ մնա, ապա դրեք կրակին, լավ խառնելով թողեք եփվի ոչ ավելի, քան 5 րոպե, ապա անցկացրեք մաղով, որ լավ քամվի: Ստացվում է բավականին մածուցիկ եւ փայլուն զանգված: Կուլին կարող եք սառնարանում պահել 7-10 օր, ոչ ավելի: Այն շատ համեղ է նաեւ պաղպաղակի, բլիթների, կաթնաշոռի հետ:
Եփված կրեմի համար պետք է կաթը շաքարավազի հետ դնել եփվելու: Այդ ընթացքում հարել դեղնուցները եգիպտացորենի օսլայի հետ, ապա ավելացնել տաք կաթնախառնուրդը: Դնել շատ մարմանդ կրակին եւ անընդհատ խառնելով եփվել մինչեւ լավ պնդանա: Դնել մի կողմ, մինչեւ ամբողջապես սառչի:
Այդ ընթացքում լավ հարել սերուցքը:
Սառած կրեմը հարել, ապա գդալ-գդալ ավելացնել հարված սերուցքը: Պետք է դառնա թեթեւ, միատարր զանգված:
Արդեն սառած խմորի վրա քսել կրեմը, ապա՝ կուլին, վերջում զարդարել թարմ ելակներով:
Ավելի մանրամասն՝ տեսանյութում:
Բարի ախորժակ:
Պատրաստեց Մելանյա Բարսեղյանը
