«Առավոտի» հետ զրույցում քաղաքական եւ ընտրական տեխնոլոգիաների փորձագետ Արմեն Բադալյանը, անդրադառնալով էլեկտրաէներգիայի թանկացման հետ կապված դժգոհություններին, նշեց, որ հասարակությունն այլեւս չի արձագանքում իշխանությունների վարքագծին, որովհետեւ տարիների ընթացքում նրա գիտակցության մեջ եղել է արմատական փոփոխություն: «Հասարակությունն այս երկրի հետ այլեւս ապագա չի կապում: Երբ հասարակությունն իր գիտակցության մեջ կտրվել է իր երկրից եւ ցանկանում է արտագաղթել, ոչինչ այս երկրի համար չի անի:
Շատերն ասում են, որ դժգոհ են՝ ինչի՞ չեն բողոքում: Բողոքում են, բողոքի լավագույն ձեւը արտագաղթն է, անգամ կարող ենք ասել, որ մեր հասարակության 90-95 տոկոսը վերածվել է ընդամենը բնակչի, որոնք ապրում են այստեղ մինչեւ արտագաղթեն կամ տեսնեն, թե ինչ են անելու, այսինքն՝ քաղաքացին մահացել է. մնացել են այն մի քանի տոկոսը: Մնացածը բողոքում է, որ հոսանքը թանկացել է, բայց հինգ հազար դրամ վերցնելով՝ գնում եւ քվեարկում է այդ իշխանությունների օգտին»:
