Արաբկիր Քանաքեռ եւ Զեյթուն վարչական շրջանների ընդհանուր իրավասության դատարանը մեղավոր ճանաչեց ԱԺ ՀԱԿ խմբակցության պատգամավոր Արամ Մանուկյանին ապտակած Արշակ Սվազյանին:
Նա մեղավոր ճանաչվեց քրեական օրենսգրքի 117 հոդվածով եւ դատապարտվեց կալանքի մեկ ամիս ժամկետով: Պատիժը դատարանի որոշմամբ, Սվազյանը պետք է կրի քրեակատարողական հիմնարկում:
Հիշեցնենք, որ Արամ Մանուկյանը հարձակման էր ենթարկվել դեկտեմբերի 11-ի երեկոյան՝ ստանալով մարմնական վնասվածքներ: Նաև ՀՀ ոստիկանության Երևան քաղաքի վարչության և Արաբկիրի բաժնի ծառայողների ձեռնարկած օպերատիվ-հետախուզական միջոցառումների շնորհիվ պարզվել է կասկածյալի անձը` 1973 թ. ծնված Արշակ Սվազյան, որը դեկտեմբերի 14-ին, ժամը 7.30-ի սահմաններում, Երևանի Ծովակալ Իսակովի 30 հասցեի մոտից բերման է ենթարկվել ոստիկանություն:
Դատական նիստից հետո Aravot.am-ը Սվազյանից հետաքրքրվեց՝ իր տեսադաշտում կա՞ն այլ քաղաքական գործիչներ, որոնց հայրենասիրական ապտակներ է նախատեսել, բայց նա շատ արագ , գրեթե վազելով դուրս եկավ դատական նիստերի դահլիճից ու մեր հարցին ի պատասխան ասաց՝ «շտապում եմ, հետո»:
Կարդացեք նաև
Ամբաստանյալի պաշտպան Լիաննա Բալյանն էլ ասաց՝ բողոքարկման հարցը կքննարկի իր պաշտպանյալի հետ, առայժմ ոչինչ չի կարող ասել:
Արփինե ՍԻՄՈՆՅԱՆ
