Այսօր Երեւանի Արաբկիր եւ Քանաքեռ- Զեյթուն վարչական շրջանների ընդհանուր իրավասության դատարանում (նախագահող դատավոր Լևոն Ավետիսյան) մեկնարկեց ՀՀ ԱԺ պատգամավոր Արամ Մանուկյանի վրա հարձակում կատարելու գործով նախնական դատական նիստը:
Հիշեցնենք, որ Արամ Մանուկյանը հարձակման էր ենթարկվել դեկտեմբերի 11-ի երեկոյան՝ ստանալով մարմնական վնասվածքներ: Նաև ՀՀ ոստիկանության Երևան քաղաքի վարչության և Արաբկիրի բաժնի ծառայողների ձեռնարկած օպերատիվ-հետախուզական միջոցառումների շնորհիվ պարզվել է կասկածյալի անձը` 1973 թ. ծնված Արշակ Սվազյան, որը դեկտեմբերի 14-ին, ժամը 7.30-ի սահմաններում, Երևանի Ծովակալ Իսակովի 30 հասցեի մոտից բերման է ենթարկվել ոստիկանություն:
Դատարանում ելույթ ունեցավ ամբաստանյալ Արշակ Սվազյանը: Նա ներկայացրեց, որ նախկինում երկու անգամ դատապարտվել է, մեկն էլ մաքսանենգության գործով:
Արամ Մանուկյանի ներկայացուցիչ Արմեն Խաչատրյանը ինքնաբացարկ ներկայացրեց մեղադրող դատախազ Գագիկ Խաչատրյանին ու հիմնավորեց. «Տեսնում ենք նախաքննական մարմնի մեղմ ասած անգործություն: Այն տպավորությունն է ստեղծվում, որ գործը ամբողջացնելու, սակայն ոչ հանցագործությունը բացահայտելու միտում կա: Մենք բազմիցս հայտարարել ենք, որ սա քաղաքական և կազմակերպված պայքարի արդյունք է և մենք մամուլում հնչեցրել ենք կոնկրետ անուններ, սակայն գործի նյութերում որևէ տեղ չի երևում քննության այդպիսի ուղղվածություն, որ դատախազը ցուցում տված լինի նման ուսումնասիրություն կատարել: Ավելին, մենք նաև հայտնել ենք, որ չենք բացառում, որ բացի մեղադրյալից լինեն նաև այն մեղավորներ: Սակայն դատախազն այս ուղղությամբ աշխատանք չի կատարել»:
Կարդացեք նաև
Ամբաստանյալի ներկայացուցիչ Լիանա Բալյանը միջնորդությանը դեմ խոսեց՝ նշելով, որ պաշտպանը բավարար հիմքեր չի ներկայացրել:
Դատախազն այս առիթով հայտնեց. «Դրանք երևակայության արդյունք են և կապ չունեն իրականության հետ»:
Դատարանը գնաց խորհրդակցական սենյակ՝ որոշում կայացնելու:
Տաթև ՀԱՐՈՒԹՅՈՒՆՅԱՆ
