89-րդ «Ռոուզ-Ռոթ» սեմինարի ընթացքում հունիսի 19-ին ԱԺ պատգամավոր Թեւան Պողոսյանը պաշտպանության փոխնախարար Արա Նազարյանից հետաքրքրվեց, թե Հայաստանի ինչի՞ն են պետք պաշտպանական ոլորտում բարեփոխումները եւ ե՞րբ կարելի է ակնկալել բարեփոխումների առաջին փուլի ավարտը:
Արա Նազարյանը պատասխանեց, որ պաշտպանության ոլորտում բարեփոխումները Հայաստանի համար անհրաժեշտություն են. «Այն անհրաժեշտ է, որպեսզի մենք իրականացնենք ռազմական ոլորտում բարեփոխումներ, որովհետեւ Հայաստանի Հանրապետությունը ՝որպես մի պետություն, որը տեղակայված է Հարավային Կովկասում, որտեղ գտնվում է համապատասխան շրջափակման մեջ, եւ փոքր ուժերով պետք է լուրջ խնդիրներ լուծենք: Եվ եթե ռազմական խնդիր ծագի՝ մենք ինքներս ենք մեզ պաշտպանելու: Մեր նպատակն է պաշտպանել Հայաստանի Հանրապետությունը եւ նրա անդորրը: Առանց նման բարեփոխումների, սպառազինության, ռազմական տեխնիկայի բոլոր ասպեկտներով մենք պետք է համապատասխան փոփոխություններ իրականացնենք, որոնք անհրաժեշտ են Հայաստանի անվտանգությունը ապահովելու համար»:
Նա հավելեց, որ Հայաստանը շատ շուտ է սկսել բարեփոխումների գործընթացը, եւ այդ գործընթացն իրականացվում է պաշտպանության նկատառումներով. «Արդյունքներն ակնհայտ են, մենք այսօր ունենք կազմակերպված, կանոնավոր Զինված ուժեր իր բոլոր կառուցվածքային բաղադրիչներով նաեւ սպառազինությամբ եւ ռազմական տեխնիկայով»:
Ամի ՉԻՉԱԿՅԱՆ
