Երեկ կեսօրին Պոլիտեխնիկի կուլիսներից լուրեր էին տարածվում, թե մի քանի դասախոսներ արդեն աշխատանքից ազատման դիմումներ են գրել։ Նորընտրիր ռեկտոր Ոստանիկ Մարուխյանը պարզաբանեց, որ համալսարանում վհուկների որս չկա, որ ոչ մի դասախոս չի հեռացել, այլ դիմումներ են գրել նախկին ռեկտորի երկու խորհրդականները եւ աշխատակազմի ղեկավարը։ «Բնական է, որ նա իր հետ բերել էր երկու խորհրդականների։ Մեկը՝ Ռաֆայել Վահանյան, մյուսը՝ Էդիկ Ղազարյան։ Նրանք հենց շաբաթ օրն են գնացել Թոքմաջյանի մոտ եւ գնալու ցանկություն հայտնել։ Մյուսը Սամսոն Զատիկյանն էր՝ աշխատակազմի ղեկավարը, իր բերած անձը, նախկին ոստիկան, որը նույնպես դիմում է գրել եւ դուրս եկել։ Սա նրա թիմն էր, եւ ես բնական եմ համարում, որ նրանք հեռանում են։ Ես ունեմ իմ թիմը, իմ մարդիկ, որոշ երիտասարդ կադրեր կան, որոնց ես կբերեմ։ Ես ինչո՞ւ պետք է պարտադրված լինեմ նրանց հետ աշխատելու»,- ասաց արդեն իրեն տեր ու տնօրեն զգացող ռեկտորը։
– Իսկ Հովհաննես Թոքմաջյանի հետ կաշխատե՞ք։
– Նա ունի գիտական թեմա մեզ մոտ եւ կշարունակի աշխատել գիտական բազայի լաբորատորիայում։ Նա չի դասավանդել մեզ մոտ որեւէ առարկա, հետեւապես, կաշխատի միայն բազայի լաբորատորիայում, թեմայի վրա։
– Ինչպե՞ս եք վերաբերվում Ձեր հաղթանակին։
Կարդացեք նաև
– Իսկական ժողովրդավարական ընտրություն էր։ Կարծում եմ՝ այսօրվա մրցակցային իրավիճակում բավականին լավ արդյունք է։ Մասնավորապես, եթե 32 հոգուց 19-ն ինձ կողմ են քվեարկել, սա բավականին լուրջ հաղթանակ է։
Սյուզան ՍԻՄՈՆՅԱՆ
Հոդվածն ամբողջությամբ կարող եք կարդալ «Հրապարակ» թերթի այսօրվա համարում
