«Ոտքի՛, Հայաստան» շարժման խորհրդի անդամ Անդրիաս Ղուկասյանը կլոր սեղան քննարկում կազմակերպելու իրենց առաջարկը մերժելու ոստիկանության քայլը համարում է քաղաքական զարգացումների հետեւանք:
«Ոստիկանությունն ուներ երկու տարբերակ՝ կամ ընդունելու կամ մերժելու ու ընդունեց երկրորդ տարբերակը: Մենք երկու տարբերակն էլ սպասում էինք:
Իսկ քննարկում կազմակերպելու առաջարկի մերժումը պայմանավորված է նրանով, որ հանրապետությունում բավականին լուրջ է հասարակական ու քաղաքական իրավիճակը, այսինքն` հիմա թվացյալ է այս հանգիստը, որը մակերեսում երեւում է: Սա նշանակում է՝ այս պահի դրությամբ ոստիկանությունը հանդիպելու կարողություն չի ունեցել: Իմ կարծիքով, հանդիպումը ողջամիտ առաջարկ էր, եթե չեն ընդունել, ապա կաշկանդված են եղել քաղաքական ուժերի ազդեցությամբ»,- կարծիք հայտնեց Անդրիաս Ղուկասյանը:
Հիշեցնենք, որ «Ոտքի, Հայաստան»-ը ոստիկանությանը «իրենց հարմար վայրում» հանդիպման էր հրավիրել՝ ակցիաների կազմակերպման հետ կապված անհրաժեշտ հարցերի շուրջ քննարկման:
Կարդացեք նաև
«Ինչ վերաբերում է քննարկումներին, կա կոնկրետ օրենսդրություն. ոստիկանությունն օրենսդրությամբ իր գործառույթներն է իրականացրել և իրականացնելու, քննարկման իմաստը չենք տեսնում։ Ոստիկանությունը կանի իր գործառույթները, հավաքի մասնակիցները պետք է լինեն օրենքով իրենց տրված իրավունքների շրջանակներում. կլինի՞ հասարակական կարգի խախտում՝ ոստիկանությունը կարձագանքի, չի՞ լինի խախտում, բնականաբար՝ ոստիկանությունը պարտավոր է ապահովել հավաքի մասնակիցների անվտանգությունը»,- «1in.am»-ին ասել էր Ոստիկանության հասարակայնության հետ կապի և լրատվության վարչության պետ Աշոտ Ահարոնյանը։
Անդրադառնալով Ոստիկանության գործառույթներին՝ Անդրիաս Ղուկասյանը հիշեցրեց, որ ոստիկանության գործունեության գնահատականը տվել հունիսի 23-ի դեպքերով տվել է մարդու իրավունքների պաշտպանը. «Որից երեւում է, որ ոստիկանների գործողություններն անթերի չէին: Այն, որ հարուցվել քրեական գործ, ծառայողական լիազորությունների շրջանակից դուրս գալու, լրագրողների աշխատանքը խոչընդոտելու, վնասելու վերաբերյալ, նույնպես վկայում են, որ ոստիկանությունը իր գործառույթներն իրականացնում է ոչ այնպես, ինչպես օրենքով սահմանված է»:
Արփինե ՍԻՄՈՆՅԱՆ
