«Մեր հանդիպումն այսօր կարող էր տեւել առավելագույնը 40 րոպե, այնպես որ՝ ոչ մի արդարացում չկա»,- լրագրողների հետ զրույցում, անդրադառնալով Սահմանադրական բարեփոխումների հանձնաժողովի եւ ԱԻՄ անդամների հանդիպման հետաձգմանն, ասաց ԱԻՄ առաջնորդ Պարույր Հայրիկյանը:
Հիշեցնենք՝ հուլիսի 31-ին Սահմանադրական բարեփոխումների հանձնաժողովը եւ ԱԻՄ անդամները պետք է հանդիպեին: Այդ հանդիպման պատճառով ԱԻՄ-ը չեղյալ հայտարարեց հուլիսի 30-ին հայտարարած հավաքը եւ երթը: Պարույր Հայրիկյանին տեղեկացրել էին, որ Սահմանադրական դատարանը շատ կարեւոր նյութեր է ստացել Վենետիկի հանձնաժողովից, եւ բոլոր աշխատակիցները պետք է զբաղվեն այդ նյութերի ուսումնասիրությամբ: ԱԻՄ առաջնորդին առաջարկել են հանդիպումը 1 շաբաթով հետաձգել:
«Այստեղ մենք բոլորս ականատեսն ենք այն բանի, որ ոչ միայն մեր ներկայացրած առաջարկներն են անբեկանելի, որ դրանց դեմ որեւէ առարկություն չի կարող լինել, այլ այն, որ այդ ճշմարտությունն ուզում են թաքցնել ձեզնից եւ ձեր միջոցով ժողովրդից: Դա է հիմնական նպատակը: Եվ մենք այս փաստից ելնելով պիտի լուրջ մտահոգվենք»,- ասաց Պարույր Հայրիկյանը:
Ըստ նրա՝ այստեղ կա 1 մտահոգություն՝ մի բան իրականացնել, որն առողջ չէ. «Իշխանությունների նախաձեռնած սահմանադրական փոփոխություններն առողջ նպատակ չեն հետապնդում, այլապես նրանք այս տեսակ քայլերի չէին դիմի»:
Կարդացեք նաև
Պարույր Հայրիկյանի կարծիքով՝ հանձնաժողովին սարսափեցրել է այն, որ հրապարակային քննարկում է տեղի ունենալու. «Խավարի եւ լույսի տարբերությունն ակնհայտ պիտի երեւար: Մի կողմում՝ նրանք ներկայացրել են խավարը մարմնավորող նախագիծ, այստեղ լույս է երեւում՝ քաղաքացի դու երկրի տերն ես»:
Ամի ՉԻՉԱԿՅԱՆ
