Երեկ ուշ ժամի մայրաքաղաքից Գյումրի էին ուղարկվել ճանապարհային ոստիկանության մեծ թվով աշխատակիցներ, որոնք քաղաքի կենտրոնական հատվածներից բազմաթիվ վարորդների բերման էին ենթարկել, նրանց մեքենաներն էլ տեղափոխել էին ճանապարհային ոստիկանության տուգանային հրապարակ: Միայն Հաղթանակի պողոտայում՝ 1,5 կիլոմետրանոց ճանապարհի վրա, ժամը 21.00-ի սահմաններում հսկողություն էին իրականացնում մոտ 7-8 ճանապարհային ոստիկանության մեքենաներ: Վերջիններս միգուցե շատերին տեղափոխեին տուգանային հրապարակ, եթե նրանց չխանգարեր անսպասելի տեղացած հորդառատ անձեւրն ու ուժեղ քամին:
Գյումրեցի վարորդները մեզ հետ զրույցում նեղսրտում էին, որ իրենց որոշել են պատժել մայրաքաղաքի «գայիշնիկների» ձեռքով. մեծ քանակությամբ բենզին են ծախսում, Երեւանից հասնում Գյումրի՝ վարորդներին տուգանելու համար: Ավելին, նրանք սա բացատրում են որպես պետական դատարկ բյուջեն լցնելու միջոց ու նեղվում են, որ դեռ իրենց թույլ են տալիս այս ամենը կատարել աղքատ գյումրեցիների հաշվին: Նրանցից ոմանք, բնականաբար, դատարանում կվիճարկեն ոստիկանների գործողությունների օրինական լինել-չլինելը, իրենց նկատմամբ վարչական ակտեր կազմելն ու տուգանելը. շատերը պնդում են, որ իրենց մեքենաները տուգանային հրապարկ են տեղափոխել առանց արձանագրություններ կազմելու:
Aravot.am-ը ՀՀ ոստիկանության լրատվության եւ հասարակայնության կապերի պատասխանատու Աշոտ Ահարոնյանին խնդրեց պարզաբանել, թե ո՞րն է նման միջոցառումների նպատակը, քանի՞ մեքենա են տեղափոխել տուգանային հրապարակ, ի՞նչ պատճառով:
«Տրանսպորտային միջոցները ոչ սթափ վիճակում վարելու, կանոնավոր ուղևորափոխադրումներ իրականացնող տրանսպորտային միջոցների կողմից ՃԵԿ-ի խախտումները հայտնաբերելու ուղղությամբ հատուկ միջոցառումների անցկացման պլանի համաձայն` ՃՈ ծառայողները օգոստոսի 4-ին Շիրակի մարզում իրականացրել են ուժեղացված ծառայություն: Կազմվել է վարչական իրավախախտման 122 արձանագրություն: Ուժեղացված ծառայության ընթացքում ոչ սթափ վիճակում, փոխարինված համարանիշերով և առանց համապատասխան փաստաթղթերի մեքենա վարելու համար ՃՈ հատուկ պահպանվող տարածք է տեղափոխվել 22 տրանսպորտային միջոց: Հայտնաբերվել են նաև հետախուզման մեջ գտնվող մեքենաներ: Միջոցառումները շարունակական են լինելու», -մեզ գրավոր պատասխանեց պարոն Ահարոնյանը:
Կարդացեք նաև
Նունե ԱՐԵՎՇԱՏՅԱՆ
Լուսանկարը՝ galatv.am կայքի
