Սեպտեմբերի 11-ին ԱԺ պետաիրավական հարցերի հանձնաժողովում պետք է քննարկվի «Ժառանգության» պատգամավոր Զարուհի Փոստանջյանի կողմից շրջանառության մեջ դրված «Մահացած զինծառայողների քրեական գործերի քննության արդյունավետությունն ու թափանցիկությունն ապահովելու, դրանք բացահայտելու, մահացածների հարազատների մատնանշած հանգամանքները մանրակրկիտ ուսումնասիրելու, քննության ողջամիտ ժամկետները պահպանելու նպատակով ՀՀ ԱԺ-ին եզրակացություն ներկայացնելու համար ժամանակավոր հանձնաժողով ստեղծելու մասին» նախագիծը:
Նախագծի քննարկմանը մասնակցելու համար տիկին Փոստանջյանը ԱԺ է հրավիրել զոհված զինծառայողների ծնողներին: Մոտ մեկ տասնյակ սեւազգեստ մայրեր արդեն ԱԺ-ում են եւ սպասում են, թե երբ են հրավիրելու իրենց ներս:
Սակայն ընդմիջմանը հանձնաժողովի նախագահ Հովհաննես Սահակյանը մոտեցավ Զարուհի Փոստանջյանին եւ զգուշացրեց, որ թույլ չի տալու նրանք մասնակցեն նիստի. «Շոու մի սարքիր»:
Զարուհի Փոստանջյանը հարցրեց, թե ի՞նչ իրավունքով, ինչպե՞ս թե չի թողնելու: Հովհաննես Սահակյանն էլ պատասխանեց՝ ԱԺ կանոնակարգ օրենքով:
Կարդացեք նաև
Ըստ Զարուհի Փոստանջյանի, հենց այդ ծնողների առաջարկով է նման նախագծով հանդես եկել, իրենք պետք է անպայման մասնակցեն նիստին, ուղղակի լսեն: Հովհաննես Սահակյանը տեղի չտվեց, ասելով, որ ներս չի թողնելու:
Հռիփսիմե ՋԵԲԵՋՅԱՆ
