Այսօր առողջապահության նախարարի տեղակալ Վահան Պողոսյանը ՁԻԱՀ-ի կանխարգելման հանրապետական կենտրոնի բակում կայանված շարժական լաբորատորիայում ՄԻԱՎ-ի դեմ արյան հետազոտություն անցավ: Նախքան հետազոտվելը Վահան Պողոսյանը կենտրոնի մասնագետի մոտ խորհրդատվություն անցավ` ինչ է ՄԻԱՎ-ը, վարակվելուց որքան ժամանակ անց է ի հայտ գալիս, որոնք են ռիսկի խմբում գտնվող քաղաքացիները եւ այլն:
Մատից արյուն վերցնելուց 20 րոպե անց առողջապահության փոխնախարարը փակ ծրարով ստացավ պատասխանը, որը նրան տրամադրեց խորհրդատուն: Նաեւ հետազոտվեցին մի խումբ լրագրողներ:
Միջոցառումը կազմակերպվել էր ՁԻԱՀ-ի դեմ պայքարի համաշխարհային օրվա առիթով: Այս տարի մեր երկրում արձանագրվել է ՄԻԱՎ վարակի 261 դեպք, անցյալ տարվա 334-ի փոխարեն:
Aravot.am-ի հարցին, թե ինչո՞վ է պայմանավորված անցյալ տարվա բարձր ցուցանիշը, ՁԻԱՀ-ի կանխարգելման հանրապետական կենտրոնի տնօրեն Սամվել Գրիգորյանն ասաց, որ վերջին 4 տարիներին գրանցվել են ՄԻԱՎ վարակի ավելի շատ դեպքեր, ինչը պայմանավորված էր լաբորատոր ախտորոշման հնարավորությունների ընդլայնմամբ եւ մեր հայրենակիցների հետհոսքով, որոնք ՌԴ-ից արդեն ախտորոշված վերադարձել են:
Կարդացեք նաև
«Կարող ենք փաստել, որ վերջին 2-3 տարիներին 59 տոկոսն այն դեպքերն են, որոնք մարդիկ, արտագնա աշխատանքի մեկնածները վարակվում են արտերկրում: Եթե ավելացնենք նրանց զուգընկերներին, ապա կստացվի, որ 73 տոկոս դեպքերը պայմանավորված են միգրացիայի գործոնով»:
Ըստ պարոն Գրիգորյանի վարակի թաքնված շրջանը կարող է տեւել միջինը 8-10 տարի, երբ վիրուսն աստիճանաբար քայքայում է մարդու իմունային համակարգը, սակայն հիվանդության նշանակալի արտահայտություններ չեն լինում եւ հիվանդը գործնականում իրեն առողջ է զգում, առիթ չի ունենում դիմել բժշկի:
Այս պահին ՄԻԱՎ-ի դեմ բուժում է ստանում 900 մարդ, դիսպանսերային հսկողության մեջ են 1500 հիվանդներ:
Պարոն Գրիգորյանը նաեւ ասաց, որ շարժական բուժախտորոշիչ կլինիկան գյուղական եւ քաղաքային հարյուր համայնքներում շրջում է եւ մարդկանց հնարավորություն տալիս հետազոտվելու: Կենտրոնի տնօրենի վստահեցմամբ, հետազոտությունն իրականացվում է անանուն:
Վահան Պողոսյանը նշեց, որ 2007 թվականից ի վեր ՄԻԱՎ վարակ ունեցող մայրերից ծնված երեխաների շրջանում հիվանդության որեւէ դեպք չի արձանագրվել: Ըստ նրա, հիվանդության վաղ ախտորոշումը, ժամանակին սկսած հակառետրովիրուսային բուժումը կյանքի որակի բարելավման հնարավորություն են տալիս, իսկ արդյունավետ բուժումը նվազեցնում է ուրիշներին փոխանցման հավանականությունը: Փոխնախարարի տվյալներով, 1988 թվականից մինչեւ օրս մեր երկրում գրանցվել է ՄԻԱՎ վարակի 2214 դեպք:
Մեր երկրում ՄԻԱՎ վարակակիրները հիմնականում արական սեռի ներկայացուցիչներ են` 1528 մարդ, 686-ը` կանայք են: ՄԻԱՎ վարակի 41 դեպք երեխաների շրջանում է արձանագրվել:
Ախտորոշման պահին վարակվածների 52 %-ը եղել է 25-39 տարիքային խմբում: Հայաստանում ՄԻԱՎ վարակի փոխանցման հիմնական ուղիներն են հետերոսեքսուալ ճանապարհը, թմրամիջոցների ներարկային օգտագործման միջոցով վարակումը: Բացի այդ, արձանագրվել են նաեւ հոմոսեքսուալ ճանապարհով, մորից երեխային եւ արյան միջոցով ՄԻԱՎ վարակի փոխանցման դեպքեր: Գրեթե բոլոր կանայք վարակվել են սեռական ճանապարհով:
Լուսինե ԲՈՒԴԱՂՅԱՆ
