Երևանի մամուլի ակումբն այսօր լրագրողներին ներկայացրեց «ՀՀ Սահմանադրության փոփոխությունների 2015թ. դեկտեմբերի 6-ի հանրաքվեի լուսաբանումը Հայաստանի հեռարձակվող ԶԼՄ-ներում» մոնիթորինգի արդյունքները: ԵՄԱ-ի նախագահ Բորիս Նավասարդյանը տեղեկացրեց, որ ուսումնասիրողները չեն արձանագրել օրենսդրության եւ կարգավորող նորմերի ակնհայտ խախտումներ. «6 հեռուստաընկերությունները՝ Հ1-ը, Հ2-ը, «Երկիր Մեդիան», Կենտրոնը, «Արմենիան», «Շանթը» եւ դրանց լրագրողներն աշխատում էին հավասարակշռված լուսաբանել արշավը, ակնհայտ կողմնապահություն չենք արձանագրել: Փորձ էր արվել կազմակերպել դեբատներ, առանձին հաղորդումներ, Ա1+Armnews համատեղ ռեալիթի շոուն, որը ցուցադրեցին նաեւ «Արմենիա»-ն եւ Հ1-ը»:
Ինչ վերաբերում է խնդիրներին, Բորիս Նավասարդյանի խոսքով, հանրաքվեներին եւ քարոզարշավին վերաբերող օրենսդրությունը թերի է մշակված. «Հունիսի տասին օրենսդրության մեջ որոշակի ճշգրտություններ մտցվեցին, բայց ոչ բոլոր հարցերն են լուծված: Բավականին կարճ ժամանակահատված էր հատկացված հեռուստաընկերություններով քարոզարշավ իրականացնելու համար: Քարոզարշավը սկսվեց հոկտեմբերի 10-ին, բայց հեռուստաընկերությունները լուսաբանման մեջ ակտիվորեն մտան նոյեմբերի 6-ից: Դա բավարար ժամանակ չէր քարոզարշավի եւ այն լուսաբանելու համար: Դա կարճ ժամանակահատված էր նաեւ քաղաքացիների համար, գիտակցված եւ իրազեկ ընտրության գաղափարը դժվար է իրական համարել»:
Բանախոսի փոխանցմամբ՝ եթե քարոզարշավին կարող էին մասնակցել բոլոր քաղաքական ուժերը, այդ թվում անհատ քաղաքացիները, ապա հեռուստաընկերությունների եթերային ժամանակից օգտվելու համար սուբյեկտների ցանկը սահմանափակ էր. «Դրանից կարող էին օգտվել միայն խորհրդարանական 6 խմբակցությունները: Հանրային հեռուստաընկերությունով եթերաժամանակ էր տրված միայն այդ խմբակցություններին, ինչը «հուշում» հանդիսացավ նաեւ մասնավոր հեռուստաընկերությունների համար»:
ԵՄԱ նախագահն արձանագրեց, որ թեեւ նշյալ հեռուստաընկերություններով լուսաբանումը հավասարակշիռ էր, բայց Հանրապետական կուսակցությունն առավելություն ստացավ. «Կարծում եմ՝ դա հիմնականում պայմանավորված է նախագահ Սերժ Սարգսյանի հարցազրույցով, որը տրվել էր մի շարք հեռուստաալիքների: Օրենքի խախտում այստեղ արձանագրել չենք կարող, բայց քարոզարշավի առումով անցանկալի քայլ էր: Այդ մեկ հարցազրույցը լիովին փոխեց պատկերը՝ մեծ առավելություն տալով Հանրապետական կուսակցությանը, որովհետեւ Սերժ Սարգսյանն ընկալվում է որպես այդ կուսակցության առաջնորդ: Հարցազրույցը հատկապես ինտենսիվ լուսաբանվում էր Հ2-ով: «Շանթը» եւ «Արմենիան» այս դեպքում ավելի համեստ գտնվեցին»:
Կարդացեք նաև
Հատկանշական է, որ հեռուստաընկերություններում 6 խորհրդարանական խմբակցություններից ավելի շատ եթերաժամանակ է տրամադրվել ՀՀԿ-ին, իսկ բոլոր քաղաքական ուժերի մեջ՝ «Ոչ»-ին:
Լուիզա ՍՈՒՔԻԱՍՅԱՆ
