«Ես դուրս եկա տնից, որպեսզի իջնեմ խանութ: Մոտեցա, որ դալանի մոտով անցնեմ եւ զգացի, որ հետեւից երկու հոգի հետապնդում են ինձ: Իրենք արագ վազեցին իմ կողմ եւ ես կասկածեցի, թե ինչու պետք է այդ երկու հոգին վազեն իմ հետեւից: Ես որոշեցի անվտանգության համար արագ գնամ հասնեմ սուպերմարկետի մոտ: Արագ վազեցի, դալանն անցա եւ հետեւից ինձ քաշեցին, գցեցին գետնին: Դրանից հետո հիշում եմ, որ ոտքերով խփում էին»,- այս մասին պատմել է «Նոր Հայաստան» ճակատի աջակից Սյուզի Գեւորգյանը:
Հիշեցնենք, որ երեկ «Նոր Հայաստան» հանրային փրկության ճակատն հաղորդագրություն էր տարածել այն մասին, որ հունվարի 5-ին, ժամը 19-ի սահմաններում միջին տարիքի երկու ամրակազմ տղամարդիկ դարանակալել են «Նոր Հայաստան» ճակատի աջակից, ռուսաստանաբնակ Սյուզի Գևորգյանին, հետապնդել են նրան, այնուհետև՝ վրա հասնելով գետին են տապալել և ոտքերով բազմաթիվ հարվածներ են հասցրել նրա գլխին, դեմքին և մարմնի տարբեր մասերին՝ պատճառելով մարմնական վնասվածքներ:
Յութուբում տարածված տեսանյութում Սյուզին պատմել է, որ մի քանի րոպե այդ անձինք ոտքերով հարվածել են իրեն. «Հարվածել են տարբեր մասերի: Երկու հոգի էին, սեւ հագած, սեւ մազերով, սպորտային կազմվածքով: Երբ որ գցեցին գետնին եւ հարվածում էին, իրենք ասացին, թե քեզ ասել ենք` էլ չերեւաս: Նրանց երեկ եմ տեսել մեր շենքի մոտ եւ հունվարի 1-ին կամ 2-ին»:
Նա նշեց, որ այդ պահին ինքն օգնություն է կանչել. «Ֆրեշ» սուպերմարկետի մոտից մի մարդ եւ կին մոտեցան ինձ: Մինչ նրանք մոտենում էին, հարձակվողները շարունակում էին հարվածել ինձ: Թե ոնց են թողել գնացել, ես չեմ տեսել, որովհետեւ ընկնելով, մի կերպ հասել եմ սուպերմարկետի մոտ»:
Կարդացեք նաև
Ակտիվիստն ասաց, որ այժմ իրեն շատ վատ է զգում. «Հարվածել են գլխիս եւ, ոնց հասկանում եմ, ձախ կողմս ընդհանրապես շատ է ցավում: Մարմնիս տարբեր մասերն են ցավում: Քիթս ուռել է, ոտքս ցավում է: Ճիշտն ասած, հիմա չեմ կարող գիտակցել, թե մարմնիս որ մասերն են ցավում, որովհետեւ ամենաշատը գլուխս է ցավում»:
Սյուզի Գեւորգյանն այս հարձակումը կապում է իր քաղաքական հայացքների հետ, քանի որ սա արդեն երկրորդ դեպքն է. «Նամանավանդ այս վերջին ամսում ես ակտիվ գործունեություն եմ ցուցաբերել, դեկտեմբերի 1-ից սկսած»:
Աշոտ ԻՍՐԱԵԼՅԱՆ
Քաղվածքներ.
1. Տարրական միամտություն է ու խիստ վտանգավոր պայքարի ելնել անպատիժ ու ամենազոր հանցագործների դեմ՝ քաղաքակիրթ ու օրինական համարվող եղանակներով: Պիտի գիտակցել որ դիմացը պատրաստ են ամեն ինչի:
2. Հայկական առակը պիտի լավ հիշել – երբեք մի փորձեք ցախավելը միանգամից կոտրել:
3. Ձեր մեթոդներն ու միջոցները պիտի լինեն անծանոթ, անսպասելի ու անհասանելի ձեր հակառակորդին:
4. Վերջապես, եթե դուք ի վիճակի չեք գերազանցության հասնելու, ապա պատրաստ պիտի լինեք հնազանդվելու, այլապես անխոհեմ ու ապարդյուն ջանքերն ավելի կթուլացնեն ձեզ ու կզորացնեն նրան: