Խոզի գրիպն ու զանազան վիրուսներն այնպես են վախեցրել, որ այսօր Էրեբունի եւ Նուբարաշեն վարչական շրջանների ընդհանուր իրավասության դատարանում «օֆշորի գործով» նիստին մեղադրյալ Աշոտ Սուքիասյանին դատարան ուղեկցող ոստիկանները բժշկական դիմակներ էին կրում: Աշոտ Սուքիասյանը խոզի գրիպի ախտանշաններ չուներ:
Դատավոր Վարդան Գրիգորյանը շնորհավորեց նիստի մասնակիցների անցած տոները եւ անդրադարձավ տուժող Փայլակ Հայրապետյանի ներկայացուցիչներից մեկին՝ Ինգա Ավագյանին:
Նախորդ նիստում դատավորը բարկացել էր, որ Ինգա Ավագյանը բացակայում էր ու դատարանին չէր տեղեկացրել պատճառների մասին. «Արդեն երկրորդ դատական նիստն է, պատշաճ չի տեղեկացնում դատարանին, որ չի ներկայանալու: Հաջորդ անհարգելի բացակայության դեպքում կքննարկենք նրան այս գործից հեռացնելու հարցը՝ դատարանի նկատմամբ անհարգալից վերաբերմունք դրսեւորելու համար: Դժվա՞ր է դիմում ներկայացնել ու ասել իր բացակայության պատճառները: Կքննարկենք, եթե գտնենք հարգելի է, կհամարենք հարգելի»:
Կարդացեք նաև
Այսօր նա Ինգա Ավագյանին հարցրեց, թե ինչու չէր եկել: Նա բացատրեց, որ նախորդ նիստին այլ դատական նիստի էր մասնակցում ու չի կարողացել տեղյակ պահել դատարանին: Նա հորդորեց այսուհետեւ տեղյակ պահել, որ նրա բացակայությունը հարգելի համարվի:
Փայլակ Հայրապետյանն էլ բացատրեց, որ ինքը այս սարսափելի գրիպներից էր, դրա համար չէր եկել:
Այս դատական նիստին էլ չէր մասնակցում մեղադրող կողմը եւ դատարանին տեղյակ չէր պահել: Դատավորը որոշեց, որ նրա բացակայությամբ անհնար է շարունակել նիստը, այն հետաձգեց մեկ շաբաթով: Հաջորդ դատական նիստը կկայանա հունվարի 21-ին, ժամը 12.00-ին:
Նիստի ավարտին «օֆշորի գործով» մեղադրյալ Աշոտ Սուքիասյանին մոտեցավ տուժողի ներկայացուցիչը՝ Շալիկո Փիրուզյանը եւ հորդորեց Աշոտ Սուքիասյանին դեռ չտանել, մինչեւ մեկ-երկու բառ փոխանակի:
Նա Սուքիասյանին նախ արդյունավետ տարի էր մաղթում ու հարցնում էր՝ իր հաշվի վրա գումար հե՞տ է եկել, թե՞ չէ:
Աշոտ Սուքիասյանը վստահեցրեց, որ հաստատ հետ չի եկել:
Հռիփսիմե ՋԵԲԵՋՅԱՆ
