ՀԱԿ խորհրդարանական խմբակցությունը հայաստանյան բոլոր քաղաքական ուժերին, քաղաքացիական եւ հասարակական կազմակերպություններին կոչ է անում ստեղծել Ընտրական օրենսգրքի փոփոխության միասնական պահանջների պլատֆորմ կամ պահանջների միասնական պլատֆորմ: Այսօր «Փաստարկ» մամուլի ակումբում խմբակցության ղեկավար Լեւոն Զուրաբյանը հնչեցրեց այդ կոչը:
Ինչո՞ւ է ՀԱԿ-ն այս կոչն անում եւ սա համարում Հայաստանի համար ամենակարեւոր խնդիրը` Լեւոն Զուրաբյանը բացատրում է. «Փորձը ցույց է տալիս, որ կյանքում կարող են կոալիցիաներ, նշանակումներ, հրաժարականներ լինեն, բայց երկրի խնդիրները` կոռուպցիան, մոնոպոլիզացված տնտեսական համակարգը եւ այլն, չեն լուծվում, ինչքան էլ ՀՀԿ-ու ՀՅԴ-ն ամուսնանա ու բաժանվեն, հասարակությանը ծրագրեր ներկայացնեն: Մեր բոլոր արատների ապաքինման միակ բանալին ազատ եւ արդար ընտրությունների ձեւավորումն է»:
Ընդդիմադիր գործիչն այսօր այդ ուղղությամբ «թռիչքաձեւ բեկում կատարելու բացառիկ հնարավորություն» է տեսնում: Չնայած, ըստ նրա, սահմանադրական բարեփոխումների հանրաքվեով ևս մեկ անգամ կեղծվեց ժողովրդի կամքը, բայց ստեղծել է մի նոր իրավիճակ, երբ «միակամ ներկայանալու դեպքում կարող ենք ռեժիմին մեր կամքը պարտադրել»:
ՀԱԿ-ը ԸՕ-ի ձեւավորման իր առաջարկներն է ներկայացրել` ընտրողների ցուցակների հրապարակում, ցուցակների մաքրում, մատների թանաքոտման եղանակով կամ էլեկտրոնային համակարգով նույնականացման եղանակով քվեարկության ապահովում եւ այլն: ՀԱԿ-ում հասկանում են, որ իշխանությունը դիմադրելու է իրենց առաջարկներին, բայց նորություն են տեսնում. «Հասարակության մեջ կեղծարարությունը մերժելու կամք կա եւ միջազգային հանրությունն էլ պատրաստ է աջակցել` եթե ժողովուրդը կոնսոլիդացվի: Բացվել է հնարավորություն, որ հասարակության կոնսոլիդացիայով եւ միջազգային ճնշմամբ կարող ենք ազդել իշխանությունների վրա»:
Կարդացեք նաև
Լեւոն Զուրաբյանը քննադատեց ԸՕ-ի հեղինակներից մեկի`Հրայր Թովմասյանի օրերս արած այն հայտարարությունը, թե աշխարհը սահմանել է, որ ընտրություններից հետո չի կարելի ցուցակները հրապարակել: «Դա տարրական սուտ է եւ չի կարելի, որ իրեն իրավաբան հորջորջող մարդը նման հայտարարություն է անում»,- ասաց նա:
Ընդդիմադիր գործիչի քննադատությունից բաժին հասավ նաեւ Վենետիկի հանձնաժողովին, որն իր կարծիքով, բացասական դերակատարում է ունենում այս գործընթացում` մերժելով ընտրացուցակների հրապարակումը: Միայն թե չի հասկանում` ինչո՞ւ են իշխանությունները այդ հանձնաժողովի ասածները «դրոշակ սարքել»: Ի հեճուկս Վենետիկի հանձնաժողովի, ինքն էլ վկայակոչում է` ԵԱՀԿ/ ԺՄԻԳ-ն այլ տեսակետ ունի` թեեւ Վենետիկի հանձնաժողովը չի ընդունում ընտրացուցակների հրապարակումը, բայց միջազգային իրավունքով դա արգելված չէ: Նա օրինակ բերեց, որ անգամ դեմոկրատիայի օրրան Միացյալ թագավորությունում էլ է սա կիրառվում:
Լեւոն Զուրաբյանը հասարակության կոնսոլիդացիայի գործընթաց այս հարցում, նկատում է: Դա օրերս 8-9 կազմակերպությունների հայտարարությունն էր` նույնատիպ պահանջներով: «Մնում է մի քայլ անել`ստեղծել միասնական պլատֆորմ»,- կարծում է Լեւոն Զուրաբյանը` հավելելով. «Կան նաեւ հավաստիացումներ, որ միջազգային հանրությունը օգնելու է, որ այդ պլատֆորմը ընդունվի»:
Հավաստիացումների շարքում նա թվարկեց Հայաստանում ԵՄ գրասենյակի ղեկավար Պյոտր Սվիտալսկու «հետեւողական աշխատանքը», ԵԱՀԿ/ԺՄԻԳ-ի հայտարարություն, ԵԽԽՎ-ի դիտորդական առաքելության հայտարարությունը սահմանադրական բարեփոխումների հանրաքվեի մասին եւ ամերիկացիների`մեզ օգնելու ցանկությունը: Լեւոն Զուրաբյանն ակնարկեց, որ նաեւ հստակ պայմանավորվածություններ կան այս առիթով: «Հանրաքվեի ժամանակ ժողովուրդն իր կամքը ցույց տալով դարձավ գործոն, որի հետ միջազգային հանրությունը հաշվի է նստում»,- ասաց նա:
Դառնալով իրենց կոչին` մանրամասնեց`«Ժառանգության» հետ խոսել են. «Արմեն Մարտիրոսյանի հետ մի քանի կոնտակտներ եղել են, ես կարծում եմ, որ խնդիր չպիտի լինի: Հարցը քննարկվել է ՕԵԿ խմբակցության ղեկավարի հետ, ոտքի վրա քննարկվել է ԲՀԿ խմբակցության ղեկավարի հետ: Մեծ հաշվով բավական բարենպաստ է իրավիճակը: Դաշնակներից, ուղղակի լավ բան էլ չեմ սպասում, բայց եթե իրենք պատրաստ են միանալ կառուցողական ձեւով…»:
Նելլի ԳՐԻԳՈՐՅԱՆ
