«Հլը արի իմ սենյակ, արի»,- այսօր խորհրդարանում այսպես է լրագրողներից մեկին դիմել ԱԺ ՀՀԿ խմբակցության պատգամավոր Մհեր Սեդրակյանը («Թոխմախի Մհեր»): Կարկառուն օրենսդիրին նյարդայնացրել են իր գործընկեր-օլիգարխներին ուղղված հարցերը: Տեսնելով, որ լրագրողը չի գնում իր սենյակ, օրենսդիրը անցել է փողոցային բառապաշարի. «Բա ուրիշ վախտ ուզում եք գաք խոսաք, դե արի խոսանք»:
Լրագրողների դիտարկմանը, որ պատգամավորը պետք է ոչ թե առանձնազրույցի կանչի լրագրողին, այլ հարցերին պատասխանի բոլորի ներկայությամբ, տեսախցիկների առաջ, ՀՀԿ-ական պատգամավորը հակադարձեց. «Նորմալ լրագրողների հետ կխոսամ, բայց աննորմալների հետ ի՞նչ խոսամ»:
Կարդացեք նաև
Իսկ մինչ այդ, ԱԺ ՀՀԿ-ական մեկ այլ օլիգարխ-պատգամավոր Սամվել Ալեքսանյանը («Լֆիկ»), խորհրդարանի միջանցքներում լրագրողներին հարցնում էր. «Հարցազրույց չեք ուզո՞ւմ, 500 եվրո բերեք, սաղ հարցերը լուծվում են»:
Լրագրողների կողմից անտեսված մնալով՝ նա նեղսրտեց. «Էս ոնց որ կրիզիս ա հա՞ ձեր մոտ, փող չկա՞»:
Ձեզ մոտ կրիզիս չէ՞`հետաքրքրվեց լրագրողներից մեկը: «Չէ, ի՞նչ կրիզիս»:
Ի դեպ, Սամվել Ալեքսանյանը ուրախ է ՀՀԿ-ՀՅԴ համագործակցության համար, բայց չի կարողանում հիմնավորել իր ուրախության պատճառը: Լրագրողներից մեկի հարցին`ինչո՞ւ է ուրախ, նա հարցով պատասխանեց. «Խի դուք ուրախ չե՞ք»:
Նելլի ԳՐԻԳՈՐՅԱՆ
