Այսօր ԱԺ էթիկայի հանձնաժողովը քննում էր երեք լրագրողական կազմակերպությունների դիմումն ընդդեմ ՀՀԿ-ական պատգամավոր Մհեր Սեդրակյանի: ՀՀԿ խմբակցության պատգամավորը, հիշեցնենք, լրագրողին իր սենյակ էր կանչել եւ հայհոյել էր: Նիստին հրավիրվել էին լրագրողներ Լիլիթ Լալայանը, Լիլիթ Թադեւոսյանը եւ Փայլակ Ֆահրադյանը:
Նիստի ավարտից հետո լրագրողների հետ զրույցում Լիլիթ Լալայանն ասաց, որ իրենք հանձնաժողովին ներկայացրել են երեք տեսանյութ: «Առաջին տեսանյութը հիմքն էր մեր դիմումի, որտեղ լսվում էր հայհոյանքը: Մեկ այլ լրատվամիջոցի նույնաբովանդակ տեսանյութ, որտեղ նույնպես լսվում էր հայհոյանքը եւ ռեմիքս տարբերակով տեսանյութ, որտեղ մի քանի անգամ լսվում էր հայհոյանքը: Մենք բոլորին անհատական ցույց տվեցինք տեսանյութերը, պարզվեց, որ միայն պարոն Թեւան Պողոսյանն է լսում հայհոյանքը»,- մանրամասնեց Լիլիթ Լալայանը:
Փայլակ Ֆահրադյանն էլ հավելեց. «Վահան Բաբայանն ասում էր`կարող է ասում է գնա գործիդ»:
Այլ մանրամասները` տեսանյութում
Կարդացեք նաև
Հիշեցնենք, նիստին մասնակցում էին հանձնաժողովի նախագահ Խոսրով Հարությունյանը, Թեւան Պողոսյանը, Սուքիաս Ավետիսյանը եւ Վահան Բաբայանը:
Լրագրողների հետ զրույցում Խոսրով Հարությունյանը հրաժարվեց որեւէ մանրամասն կամ կոնկրետ բան ասել հարցի վերաբերյալ: Ասաց, որ հարցի ամբողջական քննությունից հետո, երբ հանձնաժողովի որոշումը պատրաստ կլինի, ինքն այն կհրապարակի: Նա տեղեկացրեց, որ երկուշաբթի օրը կայանալիք նիստում կլսեն Մհեր Սեդրակյանին:
Այլ մանրամասները` տեսանյութում
Նելլի ԳՐԻԳՈՐՅԱՆ
