ԱԺ էթիկայի հանձնաժողովն այսօր վարույթ ընդունեց լրագրողների հայցն ընդդեմ ԱԺ ՀՀԿ խմբակցության պատգամավոր Մհեր Սեդրակյանի («Թոխմախի Մհեր»):
Հիշեցնենք, որ «Մեդիա և իրավունք», «Լրագրողների միավորում» եւ «Ազատ լրագրողների ասոցիացիա» հ/կ-ները դիմել էին հանձնաժողովին` քննելու համար Մհեր Սեդրակյանի պահվածքը: Վերջինս հայհոյել էր լրագրողին:
ԱԺ էթիկայի հանձնաժողովի նախագահ Խոսրով Հարությունյանը լրագրողների հետ զրույցում ասաց, որ լրագրողների դիմումը մերժելու կամ կարճելու հիմքեր չկան: Հարցով զեկուցող կնշանակվի ավելի ուշ:
Նիստին ներկա չէին Թեւան Պողոսյանը եւ Հովհաննես Մարգարյանը: Խոսրով Հարությունյանը նրանց հետ էլ կխորհրդակցի, ապա կորոշվի թե ո՞վ է լինելու զեկուցողը:
Կարդացեք նաև
Հիշեցնենք, ԱԺ կանոնակարգով, գործով որոշում պիտի կայացվի հարցը վարույթ ընդունելուց երեսուն օր հետո: Խոսրով Հարությունյանն ասաց, որ կողմերին անպայման կլսեն, բայց առանձին-առանձին: ԱԺ կանոնակարգը կողմերին լսելու ընթացակարգը թողնում է հանձնաժողովի որոշմանը:
Լրագրողներից մեկի հարցին`ինչո՞ւ առանձին-առանձին, Խոսրով Հարությունյանն ասաց. «Քանի դեռ ես հանձնաժողովի նախագահ լինեմ, երբեւէ թույլ չեմ տա`այս հանձնաժողովը վերածվի դատարանի: Մեզ պետք է հասկանալ, փաստերը, հիմնավորումներն ունենալ: Պետք չի որեւիցե մեկն իր արդարացիությունը մեզ մոտ ապացուցի»:
Նելլի ԳՐԻԳՈՐՅԱՆ
