«Շատ դրական եմ գնահատում, որ ընդդիմադիր դաշտը, քաղաքացիական հասարակությունը առաջարկեց քննարկման այդ ձեւաչափը, եւ իշխանությունները ականջալուր եղան եւ գնացին այդ ձեւաչափով քննարկումների»,- մարտի 31-ին «Մեդիա կենտրոնում» լրագրողների հետ հանդիպման ընթացքում, անդրադառնալով «4+4+4» ձեւաչափին, ասաց ԱԺ պատգամավոր Սամվել Նիկոյանը:
Նա նշեց, որ երեւույթը հենց այնպես չէ, եւ իշխանությունը հենց այնպես չէ ընդունել այդ քննարկումներին մասնակցելու առաջարկը. «Այո՛, մենք այդ մտավախություններն ունենք, կիսում ենք այդ մտավախությունը, որ անհրաժեշտ է բարձրացնել հանրության վստահության մակարդակը ընտրությունների վերաբերյալ: Այդ խնդիրը կա բոլորի մոտ, այդ թվում նաեւ իշխանության: Որպեսզի վստահության մակարդակը բարձր լինի, ապա պետք է հնարավոր լայն քննարկումների արդյունքում որեւէ որոշում կայացնել: Այն մարդիկ, որոնք ստեղծում են քաղաքական դաշտը, հանրային մթնոլորտը, նրանք գոնե բացասական ազդեցություն չունենան հանրային մթնոլորտի ձեւավորման վրա»:
Սամվել Նիկոյանը համարում է, որ եթե կողմը բերում է առաջարկներ, որոնք տեխնիկապես հնարավոր են, չկան բացասական խոչընդոտներ դրանք ընդունելու համար, ապա պետք է ընդունել. «Սա նորմալ գործընթաց է քաղաքացիական հասարակության, մեր ընդդիմադիր գործընկերների եւ իշխանության մասնակցությամբ: Կարծում եմ՝ սրանից միայն բոլորը եւ Հայաստանի Հանրապետությունը կշահեն»:
Ամի ՉԻՉԱԿՅԱՆ
Կարդացեք նաև
Լուսանկարը՝ «Մեդիա կենտրոնի»:
