ՀՀԿ խմբակցության պատգամավոր Արտակ Դավթյանը ՀՀ-ի` Եվրասիական միության գործընկերների արձագանքը` չորսօրյա պատերազմական գործողություններին համարում է «անբավարար»:
«Հայելի» ակումբում լրագրողների հետ հանդիպմանն այս առիթով նա ասաց. «Իմ տեսակետն այս հարցում այն է, որ գնահատականը անբավարարից բացի լինել չի կարող: Տեսանք, որ տարբեր պետություններ արտահայտեցին տարբեր տեսակետեր, եթե Բելառուսը տարածքային ամբողջականության վրա շեշտ կատարեց, Ղազախստանը ամեն ինչ արեց, որ ԵՏՄ վարչապետների հավաք տեղի չունենա, Ռուսաստանը որոշակի հավասարության դիրք բռնեց, ապա այս պարագայում նաև այն հարցադրումները, որոնք կան հանրության մեջ, տրամաբանական են: Մեր ռազմավարական դաշնակցից, բնականաբար, սպասումները պիտի լինեն անհամեմատ ավելի շատ, քան մյուսներից»:
Հարցին` այս պարագայում արդյոք ճի՞շտ է մասնակցելը ԵՏՄ վարչապետների հավաքին, պարոն Դավթյանը կարծիք հայտնեց, թե անկախ ամեն ինչից՝ խռոված դիրք ընդունելը ցանկացած պարագայում լավագույն լուծումը չէ:
Ըստ պատգամավորի` այդ հանդիպումները նաև այն հարթակն են, որտեղ այս տիպի հարցադրումներ արվեն, ու պիտի կոնկրետ մասնակիցներից ստանանք այդ հարցերի պատասխանները:
Կարդացեք նաև
Հարցին` արդյոք ընդունելի՞ էր ԵԱՀԿ Մինսկի խմբի համանախագահների պահվածքը, մասնավորապես այն պատճառաբանությունները, թե իրենց մանդատի մեջ չի մտնում մեղադրել այս կամ այն կողմին, պարոն Դավթյանն արձագանքեց. «Մարդիկ պատասխանել են, որ իրենց մանդատի մեջ չի մտնում, բավարարվենք, հավատանք նրանց ասածին»:
Տաթև ՀԱՐՈՒԹՅՈՒՆՅԱՆ
