«Օֆշորի» գործով վկաներից մեկը՝ ԱՄՆ քաղաքացի, Ամերիկյան համալսարանի դասախոս Արփի Բալյանը դատարանում վստահեցրել էր, որ խարդախության, փողերի լվացման մեջ մեղադրվող Աշոտ Սուքիասյանի հետ Կիպրոսում ինքն անձամբ տեսել է արքեպիսկոպոս Նավասարդ Կճոյանին: Նա վստահեցրել էր, որ նախկին վարչապետ Տիգրան Սարգսյանի անձնագրի պատճենը, որի հիման վրա Կիպրոսում օֆշորային ընկերություն են բացել, Աշոտ Սուքիասյանին տվել է սրբազան Կճոյանը:
Վկան նաեւ պատմում էր, որ ամբողջ օրը Կճոյանը Աշոտ Սուքիասյանի հետ է եղել, դրա համար էլ չի զարմացել, երբ նրա անձնագրի պատճենը տեսել է օֆշորային ընկերության փաստաթղթերում:
Այսօր Aravot.am-ը Աշոտ Սուքիասյանի պաշտպան Յուրիկ Խաչատրյանից հետաքրքրվեց՝ հաշվի առնելով Արփի Բալյանի վկայությունը, նաեւ այն, որ գործարար Փայլակ Հայրապետյանը պնդում է, որ նախկին վարչապետ Տիգրան Սարգսյանը եւ սրբազանը պետք է կանչվեն դատարան ու հարցաքննվեն, դուք դեմ չե՞ք լինի՝ նա պատասխանեց. «Արփի Բալյանի վարքագիծը խիստ կասկածելի էր, նաեւ նրա հոգեկան առողջ լինելու վիճակն էր կասկածելի: Տարբեր հակասական դրսեւորումներ ունեցավ, ինչ-որ հուզական վիճակների մեջ ընկավ, հոխորտաց, մեկ էլ արդեն լացում էր: Հակասական տարբեր վիճակի մեջ էր: Միայն վատառողջը ֆիզիկական առումով չէր, դրսեւորում էր կասկածելի հատկանիշներ: Նույնիսկ իր տված ցուցմունքների արժանահավատությունը կարելի էր ստուգել: Դատարանում իր հայտարարածները նախաքննական ցուցմունքի հետ էլ չէր համապատասխանում: Ինքը գնացել էր Կիպրոս՝ իր քրոջ ծնունդը նշելու համար եւ խառնվել էր մի տիրույթի, որի մասնագետը ինքը չէր»:
Մենք ճշտեցինք՝ դուք հարցո՞ւմ եք արել, վկան հոգեբուժարանում հաշվառվա՞ծ է եղել, որ ասում եք հոգեկան առողջ լինելը կասկածելի է՝ նա պատասխանեց. «Զուտ զգացողական եմ ասում, մարդկային վարքագիծը նաեւ տեսնել, լսելով է երեւում»:
Կարդացեք նաև
Ըստ Յուրիկ Խաչատրյանի, Արփի Բալյանը, որպես տարիքով կին, իր զգացմունքային դրսեւորումներն է արտահայտել դատարանում, որը չի կարող արժանահավատ լինել:
Մեր դիտարկմանը, որ այս վկայի խոսքերը մեկին մեկ բռնում են Փայլակ Հայրապետյանի խոսքերին: Նա էլ է ասում, որ Նավասարդ Կճոյանը Աշոտ Սուքիասյանի հետ գնացել է Կիպրոս եւ ինքն անձամբ է նրանց ճանապարհել օդանավակայանից՝ Յուրիկ Խաչատրյանը պատասխանեց. «Երկուսի խոսքը մեկ են արել, քանի որ շահագրգիռ կողմ են անընդհատ թմբկահարելու նշված հայտնի անձանց անունները: Աշոտ Սուքիասյանի վրա ռեալ փաստեր չեն կարող բերել, որ խարդախություն է արել, փողերի լվացում է կատարել, ուստի, այլ ելք չունենալով՝ նշված անձանց անունները մեջ բերելով՝ ուզում են հնչեղություն տալ»:
Հռիփսիմե ՋԵԲԵՋՅԱՆ
Տիպիկ դատական կապիկություններ…
Իսկ Դավիթ Հարությունյանը Ընտրական օրենսգրքի նախագծի վերաբերյալ՛՛փաստարկում՛՛ էր.
-Թող դիմեն դատարան, եթե դատարանը պահանջի՝ ստորագրված ընտրացուցակները կհերկայացնենք…