«Ադրբեջանն առհասարակ չի պատժվել իր կատարած հանցագործությունների համար, ինչու միայն Ռամիլ Սաֆարովի դեպքում, հիշեք բոլոր եղեռնագործությունները մեր ժողովրդի նկատմամբ՝ Բաքվում, Սումգայիթում: Ադրբեջանն այսօր էլ շարունակում է ռազմական հանցագործներին պարգեւատրել ու հռչակել ազգային հերոս»,- կարծում է փաստաբանների պալատի փաստաբան Տիգրան Աթանեսյանը:
Հիշեցնենք, որ քառօրյա պատերազմում հերոսացած զինվոր Քյարամ Սլոյանին գլխատողին Իլհամ Ալիեւը պարգեւատրել է: Պարգևատրումը երևում է ադրբեջանական Haqqin.az-ի հրապարակած լուսանկարներում:
Մեր հարցին, թե հայկական կողմն ի՞նչ քայլեր պետք է անի միջազգային ատյաններում նման հանցագործություններ իրականացնողներին պատասխանատվության ենթարկելու առումով, փաստաբանն ասաց. «Մի քանի տարբերակ կա, կարելի է Մարդու իրավունքների եվրոպական դատարան դիմել, քրեական միջազգային տրիբունալ, անկախ նրանից, որ ոչ մենք, ոչ Ադրբեջանը դրա մասը չենք հանդիսանում, տրիբունալն իրավունք ունի ռազմական հանցագործություններ քննել, որովհետեւ զինվորի գլխատումը ռազմական հանցագործություն է, բազմաթիվ կոնվենցիաների խախտում: Խոշտանգում է, որը հումանիտար իրավունքով է կարգավորվում: Ի վերջո, ՄԱԿ-ի մարդու իրավունքների կոմիտե կա, խոշտանգումների կանխարգելման կոմիտե, որին կարող ենք այդ հարցերով դիմել, բայց մենք թերացել ենք նաեւ Ռամիլ Սաֆարովի դեպքում»:
Կարդացեք նաև
ԱԺ պատգամավոր Շուշան Պետրոսյանն էլ մեզ հետ զրույցում ասաց, որ հայ զինվորների նկատմամբ ադրբեջանցիների բարբարոսություններից շատ է ազդված. «Հիվանդացել եմ նույնիսկ»:
Նա կարծում է, որ Իլհամ Ալիեւն այսօր չէր պարգեւատրի Քյարամ Սլոյանին գլխատած ադրբեջանցուն, եթե ժամանակին Ռամիլ Սաֆարովին պարգեւատրելու ժամանակ հայկական կողմն անհրաժեշտ գործողություններ աներ ու չթերանար: Պատգամավորն առաջարկեց Քյարամ Սլոյանին գլխատողին պարգեւատրելու տեղեկատվությունը թարգմանել օտար լեզուներով ու տարածել, ողողել միջազգային մամուլը:
Արփինե ՍԻՄՈՆՅԱՆ
Ալիևը չուշացրեց պարգևատրել հերթական ճիվաղին: Իսկ Քյարամի՞ն երբ են պարգևատրեու: Չէ որ հերոսի մահով է ընկել: