Եվրատեսիլ-2016 երգի հեղինակավոր մրցույթի հաղթող, Ուկրաինայի ներկայացուցիչ Ջամալան խոսել է իր հաղթանակի մասին՝ նշելով, որ շատ կցանկանար՝ հաջորդ Եվրատեսիլն անցներ Ղրիմում, ավելացնելով սակայն, որ դա քիչ հնարավոր է։ Այդ մասին հայտնում է ուկրաինական 112.ua կայքը։
Նրա խոսքերով՝ առաջիկա մեկ տարվա ընթացքում դժվար թե լուծվեն ռուս-ուկրաինական տարաձայնությունները և Ղրիմը վերադառնա ուկրաինական իշխանությունների ենթակայության տակ, ինչն էլ հնարավորություն կընձեռի Եվրատեսիլ-2017-ը անցկացնել Ղրիմում։ Ջամալան իր խոսքում մասնավորապես ասել է. «Մենք գիտենք, որ Ղրիմն այժմ բռնազավթված է։ Այո, ես շատ կցանկանայի, որ դա (նկատի ունի Եվրատեսիլ 2017-ը) տեղի ունենար Ղրիմում, բայց մենք դա չենք կարող իմանալ։ Հարցն այն չէ, որ ես չեմ հավատում, ինձ ճիշտ հասկացեք, պարզապես ես կարծում եմ, որ մեկ տարվա ընթացքում մենք չենք հասցնի դա անել»։
Տեղեկացնենք նաև, որ Եվրատեսիլ-2016 երգի մրցույթում հաղթելուց հետո Ուկրաինայի հասարակական-քաղաքական մի շարք գործիչների կարծիքով՝ հաջորդ տարվա Եվրատեսիլը պետք է անցկացնել հենց Ղրիմում։ Այսպիսի տեսակետ արտահայտողների շարքերում է նաև Յուլիա Տիմոշենկոն։
