Նախորդ տարվա վերջին հայ մանուկների գրադարանը համալրվեց «Արևի լեռը» չինական ժողովրդական հեքիաթների ժողովածուով, որտեղ ամփոփված են Չինաստանում սիրված ու տարածված 45 հեքիաթներ:
Առաջին անգամ Խնկո-Ապոր անվան ազգային մանկական գրադարանում ներկայացվելուց հետո գիրքը մայիսի 17-ին ներկայացվեց նաև Հայաստանի ազգային գրադարանում:
Այսպիսի գիրք ունենալու գաղափարը ծնվել է Հայաստանում Չինաստանի արտակարգ և լիազոր դեսպան Թիան էրլունի և բանասիրական գիտությունների դոկտոր, պրոֆեսոր Սերգո Երիցյանի հանդիպման ընթացքում:
«Դա այն ժամանակ էր, երբ Մետաքսի ճանապարհի մասին պատմող ֆիլմի նկարահանումներն իրականացնելու համար պիտի մեկնեինք Չինաստան»,- ասաց ժողովածուի կազմող Սերգո Երիցյանը, որի խոսքով՝ Հայաստանում Չինաստանի դեսպանության կողմից ժողովածուի հրատարակումը նաև արդյունք է այն ջերմ ու բարեկամական հարաբերությունների, որոնք կան Հայաստանի և Չինաստանի միջև:
Կարդացեք նաև
Դառնալով չինական ժողովրդական հեքիաթներին՝ նա նշեց, որ բովանդակային առումով դրանք, ինչպես և հնագույն մյուս ժողովուրդների հեքիաթները, նման են հայկական ժողովրդական հեքիաթներին. «Դրանք հարստացնում, մի նոր մակարդակի են բարձրացնում ընթերցող երեխաների մտածողությունը»:
Հիշեցնենք, որ նախորդ տարի՝ Ամանորի նախաշեմին, չինական ժողովրդական հեքիաթների նոր ժողովածուն դարձավ Հայաստանում Չինաստանի դեսպանատան հրաշալի նվերը հայ մանուկներին: Գրքի շնորհանդեսի ժամանակ դեսպան Թիան էրլունը հայտարարեց, որ «Արևի լեռը» նվիրվելու է Հայաստանի բոլոր դպրոցներին ու նախադպրոցական հիմնարկներին՝ նպատակ ունենալով հայ երեխաներին ծանոթացնելու չինական հեքիաթներին:
Երիցյանի փոխանցմամբ՝ այսօր մեր բոլոր դպրոցներում և նախադպրոցական հիմնարկներում արդեն կա այդ գիրքը:
«Շնորհանդեսի ժամանակ հարցադրում եղավ՝ իսկ գրադարաննե՞րը»,- հիշեց Երիցյանը՝ նկատելով, որ տեղին էր հարցը, որովհետև, ըստ նրա, եթե գրադարանները չունենային այս գիրքը, ինչ-որ բան պակաս կլիներ:
«Ի պատասխան դեսպանը խոստացավ, որ որոշ ժամանակ անց Հայաստանի բոլոր գրադարանները կունենան այն: Նրա խոստումն արդեն կատարվում է: Դեսպանի լիազորությամբ ես այստեղ եմ, որպեսզի նախատեսված խմբաքանակը հանձնեմ Ազգային գրադարանին: Հայաստանի մյուս գրադարանները ևս առաջիկայում կստանան իրենց օրինակները»,- ասաց Երիցյանը:
Սիրանուշ ՀԱՅՐԱՊԵՏՅԱՆ
