Ոմանք այսօր արդեն ձեռքի փաթաթան են դարձրել քառօրյա պատերազմի հետեւանքով 800 հեկտար տարածքի կորստի հարցը: Եվ շահարկումները շարունակվելու են. դիմացը ընտրություններ են։
Այս խնդրի շուրջ մեզ հետ զրույցում քաղաքագետ ՍԵՐԳԵՅ ՄԻՆԱՍՅԱՆԸ նախ խոսեց հակառակորդի գրաված դիրքերի մասին՝ նշելով, թե իրականում շատ դժվար է որոշել` որքա՞ն է կազմում այն` 7 հարյո՞ւր, 8 հարյո՞ւր, թե՞ մի քիչ ավել կամ պակաս։
-Խոսքը երկու բլուրների մասին է, որոնցից մեկը գտնվում է հյուսիսում` Թալիշի մոտ, մյուսը հարավում է` գրեթե Արաքսի ափին: Ու քանի որ իրադարձությունները նոր են տեղի ունեցել, դիրքերը դեռ վերջնականապես չեն ձեւավորվել, ապա դժվար է հստակ, կոնկրետ ասել այդ տարածքների չափը:
Սա նաեւ զգայուն հարց է, հետեւաբար շատ կարեւոր է, թե մենք այն ի՞նչ տեսանկյունից կդիտարկենք: Եթե խոսքը մի քանի կիլոմետրի կամ մետրի մասին է, ապա իրականում միգուցե դրանք մարտավարական առումով նշանակություն չունեն:
Կարդացեք նաև
Բայց խնդիրը մի քիչ ավելի բարդ է. հարավում գտնվող բլուրը ռազմավարական նշանակություն ունի, իսկ հյուսիսում գտնվողի դերը ավելին է այն առումով, որ բլուրը հակառակորդի ռմբակոծություններից փակում էր Թալիշ գյուղը: Ու այս պահին այդ դիրքը ադրբեջանական զինուժի հսկողության տակ է գտնվում։ Նույնիսկ հրաձգային զենքով հակառակորդը կարող է կրակել Թալիշի վրա: Սա է պատճառը, որ Թալիշ գյուղի բնակիչների մեծ մասը չի կարողանում գյուղ վերադառնալ:
Ի դեպ, եթե հարավում գրավված բլուրը, այսպես կոչված, ԼՂԻՄ-ի սահմանից դուրս է գտնվում, ապա հյուսիսինը հենց ԼՂԻՄ տարածքի մեջ է, պատկանում է Մարտակերտի շրջանին:
Այստեղ կա քաղաքական որոշման կայացման խնդիր. նման բարդ իրավիճակներում, բնականաբար, քաղաքական որոշում կայացնում ու պատասխանատվություն են կրում այն անձինք, ովքեր պետության անվտանգության երաշխավորն են:
-Հենց այդ պատասխանատվության տեսանկյունից չպե՞տք է դիտարկել ու գնահատել նախագահ Ս.Սարգսյանի հետեւյալ խոսքը. «Արդյոք արժե՞ր 800 հեկտարի համար զոհել եւս 35, 40 կամ 80 հայրենասեր տղաների… Ինձ համար շատ ավելի կարեւոր է մեր զինվորների ու սպաների կյանքը»։
-Այո, ինչպես ասացի՝ քաղաքական որոշման հարց է. իսկապես, իմաստ ունի՞ 40 կամ 80 հայրենասեր զինվոր կորցնել։ Թե՞ պետք է անտեսել 50, գուցեեւ ավելի զինվոր կորցնելու վտանգը եւ վերականգնել մինչեւ ապրիլի 2-ը եղած տարածքային իրավիճակը՝ Ադրբեջանին թույլ չտալով հույսեր փայփայել, թե որոշ ժամանակ անց ինքը կարող է նոր տարածքներ եւս գրավել:
Այս իրավիճակում քաղաքական որոշում կայացնողը երկրի գերագույն գլխավոր հրամանատարն է։ Սերժ Սարգսյանը կայացրեց իր քաղաքական ընտրությունը ասելով` ինձ համար շատ ավելի կարեւոր է մեր զինվորների ու սպաների կյանքը:
Ա. ՍԱՐԳՍՅԱՆ
Հարցազրույցն ամբողջությամբ՝ «Հայոց աշխարհ» թերթի այսօրվա համարում
