«Եթե խնդրին ռազմավարական տեսանկյունից ենք նայում, նոր բան չկա: Անգամ եթե այս համաձայնագիրը չհաստատագրվի, հայ-ռուսական հարաբերությունների նրբերանգները բացասական իմաստով այնքա՜ն ընդգրկուն են»,-այսօր ԱԺ-ի դիմաց ՀՀ-ի եւ ՌԴ-ի միջեւ ՀՕՊ միասնական համակարգ ստեղծելու համաձայնագրի հնարավոր վավերացման դեմ կազմակերպված բողոքի ցույցի ժամանակ լրագրողների հետ զրույցում ասաց ԱԻՄ առաջնորդ Պարույր Հայրիկյանը, որի համախոհներն ավանդաբար եկել էին ՀՀ-ի եւ ԵՄ-ի դրոշներով:
«Շատ քիչ պետություններ կան, որոնք պայմանագրով իրենց ազդարարել են մեկ այլ պետության թշնամի: Ռուսաստանը 1921թ. կնքել է հակահայկական պայմանագիր, որին մինչ օրս հավատարիմ է: Հայերը չեն ուզում տեսնել, որ նման պետությունը չի կարող դաշնակից լինել: Դրանից հետո Ռուսաստանը միջազգայնորեն ազդարարում է, որ ՀՀ-ի թշնամին է, ինչպե՞ս կարելի է նրան սահման եւ օդ վստահել»,-նշեց նա:
Ըստ Հայրիկյանի` Ռուսաստանն աստիճանաբար անկում է ապրում, իսկ այդպիսի պետության հետ պետք չէ ռազմավարական հարցեր կապել. «Այս տարվա աշնանն աշխարհը կանխատեսում է ՌԴ տնտեսության ծայրահեղ անկումը»:
Կարդացեք նաև
Հարցին` իշխանություններն այդքանը չե՞ն հասկանում, Պարույր Հայրիկյանը պատասխանեց. «Լրտեսին արգելված է հասկանալ, լրտեսը միայն հրաման պետք է կատարի»:
Լուիզա ՍՈՒՔԻԱՍՅԱՆ
