«Երկու երես» մամուլի ակումբում լրագրողների հետ հանդիպմանը «Քրիստոնեա-ժողովրդական վերածնունդ» կուսակցության նախագահ Սոս Գիմիշյանը հայտարարեց, թե Ռուսաստանն ինքն էլ հասկանում է, որ Թուրքիան շարունակելու է նույն կերպ վարվել Ղրիմում, Սիրիայում չի դադարելու ԻԳԻԼ-ին օգնել, քանի որ դա էլ իր բիզնեսն ու քաղաքական նպատակներն են:
Սոս Գիմիշյանը վստահեցրեց. «Այս մերձեցումը հին հարաբերություններին չի հանգեցնի»: Ըստ նրա` Թուրքիայի նախագահ Ռեջեփ Թայիփ Էրդողանը նեղն է ընկել, դրա համար ծնկի է եկել. «Մարդը ներողություն է խնդրել, ծնկի եկել: Բայց ծնկի եկած Էրդողանն էլ շատ վտանգավոր է, նա բաց դանակը պատրաստ պահելու է, որ որտեղ կարողանա, վրեժխնդիր լինի: Սա Ռուսաստանն էլ է հասկանում: Էրդողանը գնաց այդ քայլին, քանի որ Թուրքիան ծանրագույն վիճակում է. քրդական խնդիր կա, նա ուղղակիորեն օժանդակում է իսլամական պետությանը, որը աշխարհի կողմից չի ընդունվում»:
Սոս Գիմիշյանի կարծիքով` եթե ռուս-թուրքական հարաբերությունները չկարգավորվեին, կարող էինք անգամ Արևմտյան Հայաստանի հարց լուծել, Մոսկվայի, Ղարսի պայմանագրերը չեղյալ կարող էին համարվել, սակայն պատերազմի վտանգ կար: Մինչդեռ հարաբերությունների բարելավման պարագայում այս խնդիրների լուծումն անհնար է, բայց, գոնե, պատերազմի վտանգ չկա: Մերձեցման դրական հետևանքը պարոն Գիմիշյանը համարում է այն, որ Ռուսաստանի հետ նորմալ հարաբերությունները Թուրքիայի համար զսպող հանգամանք կլինի Հայաստանի հանդեպ ակնհայտ ագրեսիայի գնալու հարցում:
Տաթև ՀԱՐՈՒԹՅՈՒՆՅԱՆ
