ՀՀԿ խմբակցության պատգամավոր, ՀՀ ԱԺ Գիտության, կրթության, մշակույթի, երիտասարդության եւ սպորտի հարցերի մշտական հանձնաժողովի նախագահ Արտակ Դավթյանը հույս չունի, որ կարող է ղարաբաղյան հակամարտության հարցը լուծվել, քանի դեռ չի հստակեցվել ԼՂ կարգավիճակի հարցը:
«Հայելի» ակումբում լրագրողների հետ հանդիպմանը նա մանրամասնեց. «Ղարաբաղցիները պիտի ասեն, թե ըստ էության իրենք ինչի են պատրաստ: Եթե խոսքը գնում է զիջումների մասին, պիտի ասեն, թե ինչ զիջման մասին է խոսքը, եթե նրանց տրվում է այդ կարգավիճակն ու միջազգային ճանաչումը: Դրանից հետո ամեն ինչ իր տեղն է ընկնում»:
Արտակ Դավթյանի հավաստմամբ` կարևորագույն խնդիրը ԼՂՀ-ին բանակցային սեղան բերելն է: Նա հստակեցրեց. «Նույն ղարաբաղցին ինքը պիտի ասի, ինչի է պատրաստ հանուն կարգավիճակի հստակեցման: Մինչև ԼՂՀ-ն չվերադառնա բանակցային սեղան, այդ խնդիրը լուծում չունի, ի վերջո ղարաբաղցիներն էլ պիտի ասեն, թե ինչ են ուզում»:
Տաթև ՀԱՐՈՒԹՅՈՒՆՅԱՆ
