«Հայաստանին վարկի շրջանակում մատակարարվելիք ռուսական զենքի հարցը դեռ անորոշ է: Փոխարենը, ունենք Բաքվում ՌԴ դեսպանի հայտարարությունն այն մասին, որ Ադրբեջանին զենքի մատակարարումները շարունակվելու են: Սեպտեմբերին Պուտինի` Բաքու կատարելիք այցի շրջանակում կքննարկվեն նոր պայմանագրեր` զենքի մատակարարման մասին»,-այսօր «Փաստարկ» մամուլի ակումբում ասաց «Մոդուս Վիվենդի» կենտրոնի ղեկավար, քաղաքագետ Արա Պապյանը:
Նա նշեց, որ չի հավատում Արցախի հակամարտության խնդիրը խաղաղ ճանապարհով լուծելուն. «Հիմնական մեղավորն Ադրբեջանն է: Մեր իշխանությունները մշտապես զիջումների դիրքորոշում հայտնել են, ինչն ինձ համար անընդունելի է, սակայն Ադրբեջանը չի գնում այդ ճանապարհով»:
Քաղաքագետի կարծիքով` սանկտպետերբուրգյան, Վիեննայի եւ Փարիզում նախանշված Սարգսյան-Ալիեւ հանդիպումները չեն հեռացնում պատերազմի վտանգը. եթե Ռուսաստանը շարունակում է զենք մատակարարել Ադրբեջանին, պատերազմը մոտենում է. «Ադրբեջանն այն պահին, երբ ուզում է պատերազմ սկսել, սկսում է եւ նույն կերպ վերջացնում: Նույն բանը կարող է տեղի ունենալ ապագայում: Հիմնական դերակատարը Ռուսաստանն է, որի վրա Հայաստանը լծակներ չունի: Ռուսաստանի դերը փորձում են հակակշռել ամերիկացիները»:
Բանախոսը նշեց, որ Սերժ Սարգսյանը Կազանի փաստաթղթի շուրջ տվել է համաձայնություն, փաստաթուղթն էլ գաղտնազերծված է. «Ռուսական ծրագիրը նախատեսում է յոթ շրջանի հանձնում եւ Արցախի կարգավիճակի մասին խոսակցություններ: Ինչի՞ց եք ենթադրում, որ ռուսական կողմն այլ առաջարկներ ունի, պարզապես մանրամասներն են քննարկվում: Սա ԼՂՀ հակամարտություն չէ, այլ հայ-թուրքական դիմակայություն: Թուրքական աշխարհի խնդիրն է վերացնել հայոց պետականությունը` մաշեցնող պատերազմի միջոցով»:
Կարդացեք նաև
Լուիզա ՍՈՒՔԻԱՍՅԱՆ
Ապշել կարելի է “մեկնաբանի” կարծրամտության վրա. Ռուսաստանի բացահայտ թշնամական գործողությունները տեսնելուց հետո էլ սլաքները ոււղղվում են Թուրքիայի վրա: Հետաքրքիր է, երբ Ռուսաստանը Արցախն ու Հայաստանը լիովին կլանի, դարձյա՞լ Թուրքիան է մեղավոր լինելու: