«Ես էլ եմ կամավորական գումարտակ հավաքագրում, երկու «Վիլիս»-ները Լարսի պատճառով մնացել են, բայց զենքը ստանալու ենք ՊՆ-ից: Նույնն էլ վերաբերում է Սեֆիլյանի կամավորներին` հո բուլավկաներով չէի՞ն կռվելու, նույն կերպ ՊՆ-ից պետք է ստանային զենքը»,-այսօր «Տեսակետ» մամուլի ակումբում ասաց Առաջին հետախուզադիվերսիոն ջոկատի հրամանատար Վովա Վարդանովը` պատասխանելով Aravot.am-ի հարցին, թե ինչպես կմեկնաբանի կարծիքը, թե Շուշիի առանձնակի գումարտակի հրամանատար Ժիրայր Սեֆիլյանը ձերբակալվել է կամավորների հավաքագրման միջոցով 800 հեկտար կորցրած տարածքը վերադարձնելու մտադրության պատճառով:
«Եթե մարդիկ մտածում են, թե դա է պատճառը, սխալվում են: Չգիտեմ` ձերբակալությունն արդարացի է, թե ոչ, բայց պատճառը դա չէ, նման գործ ես էլ եմ անում, այդ դեպքում ես էլ պետք է ձերբակալվեի: Մենք հակառակորդի համար շատ ավելի վտանգավոր ենք, բայց ես ձերբակալված չեմ: Կամ իրական, կամ հորինած այլ մեղադրանք է ներկայացվել»,-ասաց Վարդանովը:
Նա նաեւ կարծիք հայտնեց, որ Ժիրայր Սեֆիլյանի ձերբակալությունը գուցե կապված է նրա ներքաղաքական գործունեության հետ:
Լուիզա ՍՈՒՔԻԱՍՅԱՆ
