Հուլիսի 21-ին «Պոստ Սկրիպտում» ակումբում արտակարգ և լիազոր դեսպան Արման Նավասարդյանն անդրադառնալով հայաստանյան վերջին իրադարձություններին, ու մասնավորապես Խորենացի փողոցում կատարվող դեպքերին՝ ասաց. «Ես կարծում եմ, որ տհաճ վիճակում ենք հայտնվել, երբ դեպքերն այնպես են զարգանում, որ մարդկանց շահերից չեն բխում: Շատ եմ վախենում այն վիճակից, որ այժմ ունենք, դեպքերը զարգանում են այն ուղղությամբ, որ վախենում եմ մտածել, թե ինչի սա կբերի: Լա՛վ, նախագահը լռում է, իր խոսքը գուցե ավելի ուշ ասի, բա մյուսնե՞րը, իսկ քաղաքական գործիչները…Սոկրատեսն ասում էր՝ խելացի խոսելը դժվար է; Հիմա մերոնք «Ազգային ջոջերը» կարդացել են ու լռել»:
Դիվանագետի ձեւակերպմամբ, ընթացել է սուր տեղեկատվական պատերազմ, որը տանուլ ենք տվել. «Ես Հայաստանի առաջին ներկայացուցիչն եմ եղել ԵԱՀԿ-ում, եւ այն ժամանակ Հայաստանը ագրեսոր չէր, մինչդեռ այսօր շատ երկրների համար ագրեսոր ենք: Շատ երկրներում ասում են՝ հայերը ահաբեկիչ են, զավթիչ, գրավել են անմեղ ադրբեջանցիների պապական հողերը: Չեմ կասկածում, որ կան ուժեր ու ինստիտուտներ, որ սա կարող են մանիպուլացնել, օրինակ` թուրքերը կհիշեն ԱՍԱԼԱ-ն, մարտի 1-ը, եւ սա: Այսօրվա ղարաբաղյան իրադարձությունների ֆոնին, սա ընդհանրապես պետք չէր:
Տարածքային զիջում, բնականաբար, չի լինի, տարածքային զիջում է պատերազմը: Հայաստանը տարածքների հանձնմանը չի գնա: Այսօր Ղարաբաղը մղվում առաջին պլան, ծանրության կենտրոնն ուզում են տեղափոխել Ղարաբաղ…Ու ես չեմ կարծում, որ բանն այն աստիճան է հասել, որ փողոց դուրս եկած ժողովուրդը պետք է վճռի Ղարաբաղյան հարցը»:
Գոհար ՀԱԿՈԲՅԱՆ
